Փետրվարի 13-ին ԱրՊՀ-ում նշվել է Տեառնընդառաջի տոնը:
Տոնի կապակցությամբ մայր բուհի ուսանողության հետ հանդիպում է ունեցել Ստեփանակերտի Սուրբ Հակոբ եկեղեցու հոգևոր հովիվ Տեր Մինաս քահանա Մովսիսյանը, ով ներկայացրել է տոնի նախապատմությունն ու խորհուրդը, ապա աղոթք հղել առ Աստված:
Խոսելով ազգային տոների վերարժևորման մասին՝ քահանա Մովսիսյանը գոհունակություն է հայտնել, որ երիտասարդությունն անտարբեր չէ ազգային արժեքների նկատմամբ և վերջին շրջանում առավել մեծ ուշադրություն է դարձնում ազգային տոներին ու ծեսերին՝ այդպիսով նաև վանելով օտարածին բարքերը:
«Մենք կրակապաշտ չենք, այլ՝ լույսով ենք դիմավորում լույսը»,-ասել է հոգևորականը՝ ընդգծելով տոնի՝ Տիրոջն ընդառաջ գնալու խորհուրդը:
Միջոցառման երկրորդ մասում ուսանողությունը հավաքվել էր Տեառնընդառաջի գլխավոր խորհրդանիշներից խարույկի շուրջ՝ ազգագրական երգերի ներքո շուրջպար բռնելով: Երիտասարդները նաև ցատկել են խարույկի վրայով, ինչը, ըստ տոնի խորհրդի, հաջողություն պիտի բերի:
Միջոցառման ժամանակ ներկաները հյուրասիրվել են ազգային ուտեստներով, աղանձով, քաղցրեղենով, չրեղենով և ընդեղենով: