Մարտի 8-ը նշվում է որպես Կանանց միջազգային օր: Մարտի 8-ից ապրիլի 7-ն ընկած ժամանակահատվածը, որն ընդունված է համարել կանանց տոնի միամսյակ, լավագույն հնարավորությունն է և առիթը` ըստ արժանվույն գնահատելու և մեծարելու կնոջը:
Հայ կինը աշխարհի մյուս կանանցից առանձնանում է նախևառաջ իր ընտանիքին անսահման նվիրվածությամբ: Հայ կինն է, որ, լինելով օջախի պահապան, նաև հայրենիքի համար մղվող պայքարում իր ուժերը չի խնայել` Վարդանանց պատերազմից մինչև Սարդարապատ, ֆիդայական շարժումից մինչև Ապրիլյան քառօրյա, հայապահպանության պայքարից մինչև այսօրվա Արցախի կերտում:
Պատմության տարբեր հոլովույթներում նա մարտնչեց, պայքարեց, բայց և ապրեց: Ապրեց, որ ապրեցնի...
Արցախի պետական համալսարանի գեղեցիկ սեռի ներկայացուցիչներին տոնի նախօրյակին անկակնկալ է մատուցվել. տղաները, շրջելով համալսարանի ստորաբաժանումներով և լսարաններով, ծաղիկներ են նվիրել կանանց և աղջիկներին ու բարեմաղթանքներ հղել:
ԱրՊՀ ՈւՇՀՀՏԱ գծով պրոռեկտոր Վիտյա Յարամիշյանը շնորհավորանքի խոսքում նշել է. «Կանանց միամսյակի կապակցությամբ շնորհավորում եմ բոլոր կանանց և աղջիկներին: Մաղթում եմ անափ երջանկություն, հարատև խաղաղություն և անսպառ ժպիտներ, թող մշտապես և ամենուր կինը լինի սիրված և գնահատված»:
«Սիրելի´ մայրեր, քույրեր, կանայք և աղջիկներ համայն աշխարհի, սրտանց շնորհավորում եմ մարտի 8-ի կապակցությամբ: Ձեզ մաղթում եմ ժպիտներ, ջերմություն, նպատակների և երազանքների իրականացում: Թող Ձեր սիրելի մարդկանց միշտ ժպտա բախտը, քանի որ եթե Ձեր սիրելիները երջանիկ լինեն, երջանիկ կլինեք և Դուք»,- շնորհավորել է բնագիտական ֆակուլտետի դեկան Վոլոդյա Միրզոյանը:
Մանկավարժության և սպորտի ֆակուլտետի դեկան Շահեն Այդինյանի շնորհավորանքի խոսքում ասվում է. «Մանկավարժության և սպորտի ֆակուլտետի և անձամբ իմ անունից բոլոր կանանց ու աղջիկներին շնորհավորում եմ գարնանային տոների կապակցությամբ: Ցանկանում եմ բոլորին քաջառողջություն, հաջողություն, սեր և ջերմություն: Թող մեր կանայք և աղջիկները շարունակեն ազնիվ ու նվիրյալ ընթացքով ծառայել մեր ընտանիքների բարօրությանը, հայրենիքի զարթոնքին ու առաջընթացին»:
«Սիրելի´ կանայք և աղջիկներ, թող երջանկությունը ապրի ձեր սրտերում, թող միշտ գարուններ լինեն ձեր կյանքում,թող խաղաղությունն ու հաջողությունը ուղեկից լինեն բոլորիդ»,- շնորհավորել և բարեմաղթել է հրատարակչության պետ Եղիշե Առուշանյանը:
Պրոֆեսոր, բանաստեղծ Սոկրատ Խանյանն էլ մարտի 8-ի առթիվ ԱրՊՀ կանանց և աղջիկներին բանաստեղծություն է ձոնել.
Մայր օջախի խելոք կանայք
Եվ աղջիկներ քաղցր ու շենշող
Այս մեծ տոնին՝ ձեզ ծով բերկրանք
Ու խաղաղ կյանք՝ արևաշող:
Մարտ է, բացվեք ձնծաղկի պես,
Մանուշակի նման բուրեք,
Դուք ազատ եք աստղերի պես,
Ձեր սերերին ջերմ համբուրեք:
Աղջիկներն էլ մեր հեզանազ
Կրթության հետ թող սեր գտնեն,
Ու նորակերտ ընտանիքով
Մայր Արցախում նոր կյանք մտնեն:
Ամեն մի տուն ծաղկով բուրի,
Սեղանները լինեն առատ,
Աշխարհը թող մեզ նախանձի,
Մեզ պես լինի միշտ անարատ:
