Այսօր ԱրՊՀ-ում հյուրընկալվել էին Ստեփանակերտի հ. 1 դպրոցի 4-8-րդ դասարանների աշակերտները: Առիթը` ռուսաց լեզվի և գրականության ամբիոնի ավագ դասախոս Նաիրա Մարգարյանի կողմից կազմակերպված միջոցառումն էր: Միջոցառման նպատակն էր ամրապնդել համալսարան-դպրոց կապը և երեխաներին ծանոթացնել բուհական առօրյային, կողմնորոշել նրանց մասնագիտական ուղղվածության հարցում:
Ռուսաց լեզվի և գրականության մասնագիտության 3-րդ կուրսի ուսանողների մասնակցությամբ կազմակերպված միջոցառման ընթացքում հանդիսատեսը վայելեց մանուկների կողմից սիրված հեքիաթների բեմականացումը, հնչեցին հանելուկներ, ուսուցողական և դաստիարակչական թեմաներով ստեղծագործություններ: Սիրված հեքիաթների կերպարներով ուսանողները քաղցրավենիք բաժանեցին փոքրիկ հանդիսատեսներին` հղելով նաև բարեմաղթանքներ: Պետք է կարողանալ հավատալ հրաշքներին և ձգտել նոր հաղթանակների. այս էր գլխավոր հղումը` ուղղված մանուկներին, իսկ մեծերին` սովորել չկորցնել մանկությունը:
Միջոցառումը բարձր գնահատեց ռուսաց լեզվի և գրականության ամբիոնի վարիչ, բ. գ. թ., դոցենտ Նունե Առաքելյանը և շնորհակալություն հայտնելով ուսանողներին ու կազմակերպիչներին` առաջարկեց այն անցկացնել նաև ավելի մեծ լսարանի համար:
Ուսումնական աշխատանքների գծով պրոռեկտոր Գ. Սահակյանը գոհունակություն է հայտնել ուսանողների կատարած աշխատանքի մասին` նշելով, որ նման միջոցառումները նպաստում են ուսումնական գործընթացն ավելի հետաքրքիր և արդյունավետ դարձնելուն:
Կարևորելով նման միջոցառումների նշանակությունը` ՈՒՇՀՀՏԱ գծով պրոռեկտոր Վ. Յարամիշյանը նշեց, որ մանուկներին սիրելի ստեղծագործություններով համեմված միջոցառումը հաճելի էր ոչ միայն փոքրիկ հանդիսատեսին, այլ նաև` մեծերին . «Այն հնարավորություն տվեց իրական աշխարհից մի պահ կտրվելու և ապրելու մանկության մոլորակում»: