ԱՐՑԱԽԸ ՀՅՈՒՐԸՆԿԱԼ ԵՐԿԻՐ Է ԵՎ ԳՐԿԱԲԱՑ Է ԴԻՄԱՎՈՐՈՒՄ ՆՐԱՆՑ, ՈՎՔԵՐ ՑԱՆԿՈՒԹՅՈՒՆ ՈՒՆԵՆ ՏԵՍՆԵԼ ՈՒ ՃԱՆԱՉԵԼ ՆՐԱՆ

27.04

2018

IMG IV  IMG IV1

Այսօրվա մեր հերոսուհին ոչ միայն ցանկացավ տեսնել ու ճանաչել, այլ նաև մնալ ու իր փոքրիկ ներդրումով նպաստել Արցախին։ Վիոլետա Բաղդասարյանը ծնվել է ՀՀ-ում: Սովորում էր ԵՊՀ սոցիոլոգիայի բաժնում: Երրորդ կուրսում էր, երբ սիրահարվեց ու ամուսնացավ: Ամուսնու հետ ապրում էին ՀՀ-ում:

 Ամուսինը զինծառայող է. 2017 թ.-ին գործի բերումով պետք է տեղափոխվեր Արցախ։ Վիոլետան, թողնելով ամեն ինչ, առանց մտածելու ամուսնու հետ եկավ Արցախ: Կրթությունը չթողնելու համար նա որոշեց ուսումը շարունակել Արցախի պետական համալսարանում, և քանի որ ԱրՊՀ-ում չկար սոցիոլոգիա բաժինը, ստիպված ընդունվեց լրագրության բաժինը: Մեկ տարի չանցած` ընտանիքով որոշեցին փոքրիկ բիզնես սկսել: Եվ բացեցին թեյի ու սուրճի մասնագիտացված փոքրիկ խանութ: Այսօր Վիոլետան իր ընտանիքի հետ շարունակում է ապրել, աշխատել, կրթություն ստանալ ու մնալ Արցախում: Ձեզ ենք ներկայացնում նրա հետ ունեցած մեր զրույցը.

-Վիոլետա, արդեն մեկ տարուց ավելի է` ինչ գտնվում եք Արցախում, արդյո՞ք այս կարճ ժամանակահատվածում կարողացաք սիրել Արցախը։

-Անկեղծ ասած, մեկ տարի այստեղ եմ, բայց նոր եմ սկսել սիրել ու ճանաչել Արցախը. մինչև չեմ գնացել Դադիվանք, Տիգրանակերտ, Շուշի, Գանձասար և այլ տեղեր, չեմ հասկացել ու զգացել Արցախի քաղցրությունը, իսկ հիմա առավել ևս շատ եմ սիրում Արցախը:

-Ինչպե՞ս ծագեց Արցախում փոքր բիզնեսով զբաղվելու գաղափարը, արդյո՞ք վախ չկար, որ կարող եք ավելի շատ տուժել, քան օգուտ ստանալ։

-Փոքր բիզնես շատ վաղուց էի պլանավորել, բայց Հայաստանում, թե Արցախում չգիտեի, ու քանի որ հանգամանքների բերումով տեղափոխվեցի Արցախ, արդեն իրագործելու ժամանակն էր։ Իհարկե, կասկածներ կային, որ մարդկանց կողմից կարող է չընդունվել այն պատճառով, որ ես Արցախից չեմ և այլ պատճառներ, բայց հիմա շատ գոհ եմ, թե ինքս իմ կատարած աշխատանքից, և թե մարդկանց վերաբերմունքից, ովքեր տեսնում ու գնահատում են իմ կատարած աշխատանքը:

-Եվ ուսանող, և ամուսնացած կին, և անհատ ձեռնարկատեր: Արդյո՞ք այս երեքը մեկը մյուսին չի խանգարում:

-Իհարկե դժվար է երեքը մեկում, շատ դժվար է, բայց աշխատում եմ օրս բաժանել մասերի և օպերատիվ օգտագործելով` երեքն էլ հասցնել: Առավոտյան ես ուսանող եմ, կեսօրին «businesswoman», իսկ երեկոյան ընտանիքի հոգսերը հոգացող կին:

-Ապագայում ի՞նչ ծրագրեր ունեք, համալսարանն ավարտել ու վերադառնալ Հայաստա՞ն, թե՞ մնալ ու զբաղվել ձեր փոքր բիզնեսով:

-Դե եթե բիզնես ստեղծել եմ Արցախում, կշարունակեմ ընդլայնել այստեղ, բացի այդ, ուզում եմ ինչ- որ փոքր ներդրումով ես ևս նպաստել Արցախի շենացմանը:

-Գործի բերումով Ձեր ամուսնու հետ տեղափոխվեցիք Արցախ` ՀՀ-ում թողնելով ամեն ինչ՝ թե ծնողներ, հարազատներ, թե ընկերներ և թե ուսում, արդյո՞ք դժվար չէր այդպիսի որոշում կայացնել:

-Եթե սիրում ես, հանուն քո սիրո պատրաստ ես ամեն ինչի, և ես սիրելով եմ եկել ու մինչև հիմա չեմ փոշմանել ոչ մի արածիս համար: Իհարկե այնտեղ թողել եմ ընտանիք, ընկերներ և ուսում, բայց վերագտել եմ այստեղ ինքս ինձ:

-Երբ զինծառայողը հանգամանքների բերումով պետք է տեղափոխվի մի տեղից մյուս տեղ, շատ ընտանիքներ կանգնում են փաստի առաջ: Դուք` որպես զինծառայողի կին և այդ ամենի միջով անցած մարդ, ինչպե՞ս եք մոտենում այդ հարցին։

-Միանշանակ, որտեղ` ամուսինը, այնտեղ էլ` կինը: Չկա որևէ մեկ այլ տարբերակ, իհարկե սա իմ սուբյեկտիվ կարծիքն է:

-Արցախ գալով ընտրեցիք և ընդունվեցիք լրագրություն բաժինը, իսկ լրագրությամբ զբաղվել և աշխատել Ձեր պլաններում կա՞։

- Ես ուզում եմ շարունակել այն, ինչ սկսել եմ, բայց ես չեմ սկսել ուսումս լրագրությամբ: Իհարկե, կավարտեմ լրագրությամբ, բայց կաշխատեմ նրանով, ինչով որ սկսել եմ:

-Ինչպե՞ս ընդունեց Արցախը Ձեզ, օտար շրջապատին հարմարվելը դժվա՞ր էր, թե՞ շատ հեշտ կարողացաք հարմարվել Արցախի հասարակությանն ու արցախյան կյանքին:

-Սկզբնական շրջանում այդքան էլ չեմ շփվել Արցախի ժողովրդի հետ, քանի որ, անկեղծ ասած, տարբերություն կար, և հենց առաջինը լեզվի մեջ, որովհետև, երբ իմ շրջապատում խոսում էին, ես կամ չէի հասկանում, կամ էլ կիսով չափ էի հասկանում, և դա շատ էր խանգարում իմ հարմարվելուն, բայց հիմա ես ոչ միայն հարմարվել ու համարյա ամբողջովին հասկանում եմ արցախյան բարբառը, այլ նաև փորձում եմ խոսել այդ բարբառով:

- Ի՞նչ կմաղթեք Արցախ աշխարհին:

-Մաղթում եմ, որ հայոց սուրբ հայրենիք Արցախում միշտ լինի խաղաղություն:

Զրույցը` Մարիամ Գրիգորյանի, լրագր. 3-րդ կուրս:

 

Обновлено 27.04.2018 12:34