ԱրՊՀ բնագիտական ֆակուլտետի աշխարհագրության, կենսաբանության, քիմիայի և ֆիզիկայի առաջին կուրսեցիների կուրսղեկի ժամն անցկացվեց օզոնի շերտի պահպանության միջազգային օրվա խորհրդին համահունչ: Դաս-միջոցառումը վարում էր կուրսղեկ, աշխարհագրության դասախոս Ռուբինա Թովմասյանը: Նրա խոսքով` ուսանողները բավականին տեղեկացված էին օզոնային թաղանթի նշանակության, դրա քայքայման պատճառների ու հետևանքների մասին, դասն էլ ծառայեց նրանց ունեցած գիտելիքների խորացմանն ու ամրապնդմանը:

Ցուցադրվեց փաստագրական կարճամետրաժ ֆիլմ, որտեղ ներկայացված է ոչ միայն խնդրի էությունը, այլև օզոնի շերտի վերականգնման ուղղությամբ աշխարհում իրականացված միջոցառումների դրական, տեսանելի արդյունքները:

«Գլխավոր նպատակը ևս մեկ անգամ և՛ նշված խնդրի, և՛ էկոլոգիական բնույթի բազմաթիվ այլ խնդիրների լուծման հրատապությունն ընդգծելն էր: Նման դաս-միջոցառումները փոքրիկ քայլ են «էկոլոգիական գրագիտությունը» զարգացնելու ուղղությամբ»,-նշել է Ռ. Թովմասյանը: