Գիտելիքն անգնահատելի արժեք է

19.09

2019

MyCollages 1Նոր ուսումնական տարին արդեն իր լիազորությունների մեջ է: Ի՞նչ նշանակություն ունի գիտելիքը, համալսարանական կրթությունը ժամանակակից ուսանողի համար, ինչպիսի՞ սպասելիքներ ունեն ուսանողները նոր ուսումնականից: Այս և հարակից այլ հարցերի շուրջ զրուցում ենք հայոց լեզու և գրականություն 3-րդ կուրսի ուսանողուհի Լիլիանա Հայրիյանի հետ:

 

-Քո կարծիքով ի՞նչ է գիտելիքը, ի՞նչ ուժ և ներգործություն ունի այն մարդու վարքագծի ու ապագայի վրա:

-Ես կցանկանայի այս հարցին պատասխանել Գորկու հետևյալ խոսքերով. «Չկա ավելի հզոր ուժ, քան գիտելիքը. գիտելիքներով զինված մարդը անպարտելի է»: Այն մարդուն ուժ է տալիս հակադրվելու չարին ու անարդարությանը: Մշտապես պետք է հիշել, որ ամենահամարձակ մարդը վախկոտ է դառնում, երբ նա չունի հաստատուն հայացքներ ու գիտելիքներ:

-3-րդ կուրսի ուսանողուհին ի՞նչ սպասումներ ունի նոր ուսումնական տարուց:

-Նպատակ ունեմ առավել արդյունավետ օգտագործել ուսումնական այս տարին մասնագիտական գիտելիքների խորացման և նորանոր հաջողություններ գրանցելու համար: Հուսով եմ, որ կտրվեն հետաքրքիր ու օգտակար դասընթացների մասնակցելու հնարավորություններ:

-Լիլիանա, կարո՞ղ ես հակիրճ ներկայացնել քո ուսանողական տարիների ձեռքբերումները:

-Կարծես թե հաջողվել է դրական արդյունքներ կամ առաջադիմություն ապահովել ուսման և հասարակական ակտիվության ոլորտներում: Համալսարանը ոչ միայն գիտելիքների, այլև հմտությունների ձեռքբերման միջավայր է, ուստի ձգտում եմ բաց չթողնել դրանք զարգացնելու հնարավորությունը:

-Ըստ քեզ` ինչպիսի՞ առավելություններ ու հնարավորություններ ունեն ԱրՊՀ  ուսանողները:

-Առաջին կարևորագույն առավելությունն այն է, որ մենք ստանում ենք անհրաժեշտ գիտելիքներ` ապագայում պահանջված մասնագետ դառնալու համար: Արցախի մայր բուհը համագործակցում է այլ համալսարանների հետ և ընձեռում է հնարավորություն` մասնակցելու դասընթացների, գիտաժողովների ինչպես Արցախում, այնպես էլ Հայաստանում և արտերկրում: Անցած տարի մասնակցել եմ ռուս-հայկական համալսարանում կազմակերպված ուսանողական գիտաժողովին և վերադարձել  հարուստ փորձով և անմոռանալի հիշողություններով: Նմանատիպ միջոցառումները երիտասարդներին դարձնում են ավելի անկաշկանդ, համարձակ և առանց բարդույթների: Մերօրյա երիտասարդը պետք է կարողանա արտահայտել իր կարծիքը, ձևակերպել իր ցանկությունները և չվախենալ դրանց մասին բարձրաձայնել: Իմ կարծիքով՝ այս ամենի համար մեր համալսարանում ստեղծված են անհրաժեշտ պայմաններ:

-Ո՞վ է դասախոսի քո իդեալը:

-Դասախոսի իմ իդեալը կիրթ, հետաքրքիր, նորարար և համարձակ մասնագետն է: Միշտ սիրել եմ խարիզմատիկ ու վառ անհատականությունների, ուստի այս երկու հատկանիշները ևս կարևորում եմ:

-Ի՞նչ կմաղթեիր կամ ի՞նչ խորհուրդ կտայիր առաջին կուրսեցիներին, որոնք դեռ նոր են անցնելու այն ճանապարհով, որի կեսը դու արդեն անցել ես:      

- Առաջին կուրսեցիները մշտապես պետք է հիշեն, որ, ճիշտ է, գիտելիքն անգնահատելի արժեք է, սակայն ուսանողական կյանքը միայն լսարանով, սովորելով ու դասախոսություններով չի սահմանափակվում: Ուսանողական կյանքը ավելի հետաքրքիր ու բովանդակալից է դառնում նաև ներբուհական տարբեր միջոցառումներով, որոնց նախաձեռնողներից մեկն էլ տվյալ բուհի ուսանողը պետք է լինի: Եղեք ազնիվ, նպատակասլաց ու բարեխիղճ և ձեր հաջողոթյունները կլինեն շարունակական:

Հարցազրույցը՝ Նանե Հարությունյանի

Լրագրություն 3-րդ կուրս

Обновлено 19.09.2019 06:47