Օգոստոսի 31-ին տեղի է ունեցել ԱրՊՀ գիտխորհրդի նիստ, որի ընթացքում քննարկվել և հաստատվել են ուսումնական գործընթացին վերաբերող մի շարք հարցեր, տպագրության երաշխավորվել ուսումնամեթոդական ձեռնարկներ, կազմակերպվել պրոֆեսորադասախոսական կազմի թափուր պաշտոնների մրցույթի արդյունքների հաստատման նպատակով քվեարկություն:
2020-2021 ուստարվա ուսումնական գործընթացի մեկնարկի հետ կապված՝ ԱրՊՀ-ում պարապմունքների հոսքային խմբերում դիմակ կրելը կլինի ցանկալի, փոքր խմբերում՝ ոչ պարտադիր: Հակահամաճարակային մյուս կանոնների պահպանման մասին առաջիկայում կլինեն նոր իրազեկումներ: Ուսումնական գործընթացը առաջին կուրսեցիների համար կմեկնարկի սեպտեմբերի 1-ից, 2-րդ, 3-րդ, 4-րդ կուրսեցիների համար` սեպտեմբերի 7-ից, մագիստրատուրայի ուսանողները ևս սեպտեմբերի 7-ից կհաճախեն դասընթացների, որից հետո կանցնեն հեռավար ուսուցման:
Բնասիրական ֆակուլտետի դեկան Լ. Մարգարյանը մշակել է «Հեռավար ուսուցման համակարգի ներդրման հայեցակարգը» և այդ հիմքում մշակված հեռավար ուսուցման կարգը: Ներկայումս կազմվում են դրանից բխող դասախոսների և ուսանողների ուղեցույցները: Նրա խոսքով` հեռավար ուսուցման կարգի մշակումը անհրաժեշտություն էր և, առանցքային դարձնելով փորձի արդյունքում ձեռք բերած ճանաչողությունը, էլեկտրոնային հարթակի ներդրման աշխատանքներին զուգահեռ մշակվել է հայեցակարգը: Գործողությունների իրավական հիմքով ամրագրումը կապահովի հայեցակարգի հաստատումը:
ԱրՊՀ էլեկտրոնային ուսուցման նոր հարթակի ներդրման մասին տեղեկատվություն է ներկայացրել որակի ապահովման բաժնի վարիչ Շ. Սաղյանը` նշելով, որ առցանց համակարգի ներդրման առկա աշխատանքներում լուծելի խնդիրներից են աշխատող ուսանողների արդյունավետ ներգրավումը ուսումնական գործընթացում, ավանդական կամ լսարանային դասավանդման արդիականացումը և բարելավումը, արտակարգ իրավիճակում կրթության անընդհատության ապահովումը: Այդ ուղղությամբ տարվող աշխատանքները փուլային են: Արդյունքում համալսարանն ունի էլեկտրոնային կրթական հարթակ, էլեկտրոնային կրթական համակարգի առաջնային օգտատերեր, որոնց վերապահվել են նախապես սահմանված գործառույթներ.
«Համակարգը ենթակա է համալրման, գործառույթներն իրականացվում են պատշաճ մակարդակով և ըստ ժամանակացույցի: Նախատեսվում է պրոֆեսորադասախոսական կազմի երկրորդ վերապատրաստում: Պլանային է նաև ուսանողների վերապատրաստման ժամանակացույցի հավաքագրումը և վերհանված խնդիրների քննարկումը»,- ասել է որակի ապահովման բաժնի վարիչ Շ. Սաղյանը:
Օրակարգի հաջորդ հարցով ԱրՊՀ ուսումնական աշխատանքների գծով պրոռեկտոր Գ. Սահակյանը տեղեկատվություն է ներկայացրել 2019-2020 ուսումնական տարվա II կիսամյակում հեռավար ուսուցման արդյունքների մասին:
Գիտխորհուրդը հաստատել է բակալավրիատի առկա /2020-2024 ուսումնական տարվա/ և հեռակա /2020-2025 ուսումնական տարվա/ ուսուցման համակարգերի և մագիստրատուրայի առկա /2020-2022 ուսումնական տարվա/ ուսուցման համակարգի ուսումնական պլանները, 2020-2021 ուստարվա ուսումնական գործունեության օրացույցի և փորձուսուցման ժամանակացույցի մասին նախագծերը:
Նիստի ընթացքում ԱրՊՀ պրոֆեսորադասախոսական կազմի թափուր պաշտոնների մրցույթի արդյունքների հաստատման նպատակով կազմակերպվել է նաև փակ գաղտնի քվեարկություն: