Այսօր Արցախի պետական համալսարանում կազմակերպվել է հանդիպում բանաստեղծ, կինոսցենարիստ, փիլիսոփայական գիտությունների դոկտոր Սլավի-Ավիկ Հարությունյանի հետ: Հանդիպմանը ներկա էին համալսարանի ռեկտորը, դասախոսներ և ուսանողներ:
«Սլավի-Ավիկ Հարությունյանը դեռևս ուսանողական տարիներից առանձնանում էր և այն եզակի ուսանողներից էր, ով այդ տարիներին հրատարակել է իր առաջին բանաստեղծությունների ժողովածուն, որը մեծ արձագանք է գտել ինչպես Արցախում, այնպես էլ Հայաստանում և նրա սահմաններից դուրս»,- նշել է ռեկտոր Ա. Սարգսյանը` հավելելով, որ հատկանշական է նաև այն հանգամանքը, որ նրա բանաստեղծությունները ներառվելու են հանրակրթական դպրոցական գրականության ծրագրերում:
Հանդիպմանը ելույթներով հանդես են եկել բ .գ. դ. , պրոֆեսոր Ս. Խանյանը, բ.գ.թ., դոցենտ Զ. Սառաջյանը, բ.գ.թ. Տ. Սողոմոնյանը, մի խումբ ուսանաղներ էլ ասմունքել են բանաստեղծի ստեղծագործություններից:
Սլավի- Ավիկ Հարությունյանը նշել է, որ, ապրելով Արցախից դուրս, ոչնչով չի տարբերվում տեղացիներից և իր մեջ կրում է Արցախից մի մասնիկ: Նա իր ընթերցողներին խորհուրդ է տալիս դուրս գալ սեփական փակ մշակույթից և չվախենալ օվկիանոս թափվելուց, քանի որ թափվելուց հետո միայն կհասկանան, որ այդ օվկիանոսը հենց իրենք եք:
Սլավի-Ավիկ Հարությունյանը ծնվել է 1965 թ. ապրիլի 19 -ին Լեռնային Ղարաբաղի Չլդրան գյուղում: 1982 թ. ավարտել է Չլդրանի միջնակարգ դպրոցը ու նույն թվականին ընդունվել Ստեփանակերտի մանկավարժական ինստիտուտի բանասիրական ֆակուլտետը (այժմ Արցախի պետական համալսարան), 1983 թ. ուսումը կիսատ է թողել և մեկնել Խորհրդային բանակ, 1983-1985 թթ. ծառայել է Սիբիրում,1985-1988 թթ. շարունակել է ուսումը Ստեփանակերտում, 1988 թ. վերջին կուրսում սկսել է աշխատել ԼՂԻՄ-ի նոր բացված հեռուստատեսությունում։ Տարբեր տարիների եղել է թղթակից, խմբագիր, ավագ խմբագիր, 1988 թվականից ԽՍՀՄ գրողների միության անդամ (այժմ ՀԳՄ և Ռուսաստանի ԳՄ անդամ), 1990 թ. միաժամանակ եղել է «Արցախյան շաբաթ» թերթի հիմնադիր-խմբագիրը, 1993-1995 թթ. աշխատել է ՀՀ ՆԳ «02» ծառայությունում, 1995-1997 թթ. սովորել և ավարտել է Համառուսաստանյան կինեմատոգրաֆիայի ինստիտուտի կինոսցենարական ֆակուլտետը,
1997-2000 թթ. սովորել և ավարտել է Մոսկվայի Մշակույթի և պետական արվեստների համալսարանի ասպիրանտուրան:
Պաշտպանել է թեկնածուական թեզ («Գրական երկերի էկրանավորումը որպես արվեստների փոխհարաբերությունների յուրահատուկ ձև» թեմայով) և ստացել փիլիսոփայական գիտությունների թեկնածուի գիտական աստիճան, 2005-2015 թթ. եղել է «Ռուսֆիլմ» կինոընկերության գլխավոր պրոդյուսերը։ 2005-2007 թթ. աշխատանքին համատեղ սովորել է Մոսկվայի Մշակույթի և արվեստների պետական համալսարանի դոկտորանտուրայում, 2007 թ. «Արվեստի նշանագիտական սահմանները» թեմայով պաշտպանել է ատենախոսություն և ստացել փիլիսոփայական գիտությունների դոկտորի գիտական աստիճան: Հեղինակ է մի քանի տասնյակ գիտական հոդվածների, երեք մենագրության, մասնակցել է ավելի քան մեկ տասնյակ ֆիլմերի արտադրության՝ հայերեն, ռուսերեն, իսպաներեն, կատալերեն լեզուներով՝ այդ թվում Դ. Սելինջերի հանրահայտ «Եվ այդ շուրթերը, և այդ կանաչ աչքերը» պատմվածքի էկրանահանման պրոդյուսերն է։
Նրա բանաստեղծությունները թարգմանվել և տպագրվել են տարբեր լեզուներով ինչպես թերթերում, ամսագրերում, այնպես էլ առանձին գրքերով։ Հայերենից ու ռուսերենից բացի նրա գրքերը տպագրվել են իսպաներեն։
COVID-19- դեմ համաշխարհային պայքարը նշանավորվել է նաեւ Մեքսիկայում լույս տեսած «Մենք կղզի չենք» տարեգրքով։ Աշխարհի մի քանի տասնյակ երկրների գրողների ստեղծագործությունների այս ընտրանին եկող ուսումնական տարում ընդգրկվել է Նյու Յորքի համալսարանի բանասիրության եւ լրագրության ֆակուլտետի լրացուցիչ ծրագրում։ Պոեզիայի բաժինը՝ տարեգրքում,տասնմեկ բանաստեղծությամբ բացում է ժամանակակից հայ բանաստեղծ Սլավի-Ավիկ Հարությունյանը։
Բարսելոնայում վերջերս լույս է տեսել նրա «Խաղաղ օրեր» իսպաներեն-հայերեն երկլեզու գիրքը (200 էջ, Բարսելոնա)։
Ս.-Ա. Հարությունյանը ապրում է Մոսկվայում և Բարսելոնայում:
