Արցախի պետական համալսարանում առաջին կուրսեցիների հետ իրազեկման ակտիվ աշխատանքներ են տարվում: Ըստ ֆակուլտետների հանդիպումներ են կազմակերպվել ուսանողության հետ, նրանց ծանոթացրել համալսարանական ներքին կանոնադրությանն ու կառույցներին: Ուսանողների հետ տարվող աշխատանքների գծով պրոռեկտոր Վ. Յարամիշյանը ուսանողներին ներկայացրել է էլեկտրոնային ուսուցման նոր հարթակի հնարավորությունները, իրազեկել համալսարանական ներքին կանոնների մասին՝ հորդորելով բոլոր ուսանողներին հուզող հարցերի դեպքում բարձրաձայնել և դիմել համապատասխան ստորաբաժանումներին:
«Ուսումնասիրեք ձեր իրավունքներն ու պարտականությունները, տիրապետեք դրանց: Ձեզնից է կախված մայր բուհի վարկանիշը, ուստի պահաջատեր եղեք գիտելիքների ձեռք բերման հարցում»,- իր խոսքում նշել է Վ. Յարամիշյանը՝ հավելելով, որ ակտիվ ուսանողական տարիներ ունենալու համար ընդգրկվեն ուսանողական տարբեր խմբերում և իրենց դրսևորեն լավագույն հատկանիշներով: Հանդիպման ընթաացքում պրոռեկտորը անհրաժեշտ տեղեկություն է հաղորդել ուսումնական գործընթացի վերաբերյալ, պատասխանել նրանց հարցերին:
Ուսանողների հետ տարվող աշխատանքների բաժնի պատասխանատու Վ. Գալոյանը ուսանողներին ներկայացրել է, թե ինչպես են կազմակերպվում ուսանողական միջոցառումները համալսարանում և ինչպես կարող են ցանկացողները ընդգրկվել: Նա նշել է նաև առաջիկայում նախատեսվող միջոցառումների մասին` ակնկալելով, որ առաջին կուրսեցիները նախորդ տարիների ուսանողների պես կփայլեն իրենց նախաձեռնողականությամբ և ակտիվությամբ:
«Ճիշտ և տեղին օգտագործեք ձեզ ընձեռված հնարավորություններն ու թանկ ժամանակը: Ուսանողական տարիները ձեր կյանքի ամենահիշվող տարիներն են լինելու, և դրանց լիարժեք կազմակերպումը կախված է լինելու միայն ձեզնից»,-նշել է Վ. Գալոյանը:
