ԱրՊՀ-ում շարունակվում է «Ճանաչի՛ր Արցախը» խորագիրը կրող արշավների ծրագիրը։ Այսօր մի խումբ ուսանողներ ուղևորվեցին դեպի Տնջրի և Ամարասի վանական համալիր։ Այցելությունը և՛ ճանաչողական էր, և՛ ուսուցողական: Արշավի հերթական խմբի անդամները ծանոթացան Արցախի պատմամշակութային վայրերին և մեծ համախմբվածությամբ ու պատրաստակամությամբ մաքրեցին շրջակա տարածքը:
«Աշխարհագրություն» մասնագիտության 3-րդ կուրսի ուսանողուհի Մարիամ Ասրյանը կիսվել է օրվա տպավորությամբ և նշել, որ լավ մասնագետ դառնալու ամենամեծ նախադրյալներից մեկը հայրենաճանաչողությունն է, և ուսանողների այս մեծ ու կարևոր պահանջմունքը բավարարելու համար արշավների կազմակերպումը հիանալի միջոց է:
«Այսօր ԱրՊՀ ուսանողության հետ նորովի բացահայտեցինք մեր պատմական հզոր հիմքերն Ամարասում: Անհավանական զգացողությունների տեղատարափ էր, ևս մեկ անգամ հպարտություն ապրեցի, որ հայ եմ, քրիստոնյա եմ»,-ասել է Մ. Ասրյանը:
«Կառավարում» մասնագիտության առաջին կուրսի ուսանողուհի Վիկտորյա Երեմյանը իր երախտագիտությունն է հայտնել ծրագրի կազմակերպիչներին և նշել . «Շնորհակալ ենք Արցախը նորովի բացահայտելու և ուսանողությանն այդ ծրագրի մի մասնիկը դարձնելու համար»: