ԱրՊՀ-ում մեկնարկել է ոչ ֆորմալ կրթության ծրագիրը, որի շրջանակներում սեպտեմբերի 25-ին համալսարանում դասախոսությամբ հանդես է եկել ՀՀ ԳԱԱ կենսատեխնոլոգիայի կենտրոնի լաբորատորիայի վարիչ, ԵՊՀ դասախոս, վիրուսոլոգ Նելլի Հովհաննիսյանը:
ԱրՊՀ ռեկտոր Արմեն Սարգսյանը շնորհակալություն է հայտնել բանախոսին և հանդիպման նախաձեռնող Կ. Օհանջանյանին` կարևորելով ոչ ֆորմալ կրթության նշանակությունը ուսումնագիտական կյանքի արդյունավետության բարձրացման գործում:
Վիրուսոլոգ Ն. Հովհաննիսյանը հանդես է եկել «Covid-19՝ սուր շնչառական վարակի հարուցիչ» թեմայով դասախոսությամբ: Նա խոսել է մարդուն վարակող հայտնի կորոնավիրուսների մասին և առավել մանրամասն ներկայցրել SARS-COV-2 վիրուսը՝ նշելով, որ այն արագ տարածվող, բայց ոչ ագրեսիվ վիրուս է: Դասախոսության ընթացքում վիրուսոլոգը տեղեկատվություն է տվել հակավիրուսային դեղերի մասին և պատասխանել ներկաների հարցերին:
«SARS-COV-2 սովորական գրիպ չէ, այն կարող է շնչառական լուրջ խնդիրներ առաջացնել: Պետք է պահպանել հակահամաճարակային բոլոր կանոնները, հնարավորինս խուսափել մարդաշատ վայրերից, մինչև համավարակի նահանջը և մեր վերադարձը բնականոն կյանքին»,- իր խոսքում նշել է բանախոսը: