Փետրվարի 21-ը նշվում է որպես մայրենի լեզվի միջազգային օր: ԱրՊՀ- ում օրը նշանավորվեց միջոցառմամբ, որը նախաձեռնել էր բանասիրական ֆակուլտետի ակադեմիկոս Ս. Աբրահամյանի անվան հայոց լեզվի ամբիոնը: Ողջունելով ներկաներին և շնորհավորելով տոնի առթիվ` ամբիոնի վարիչ, բ.գ.թ., դոցենտ Հասմիկ Ղազարյանը կարևորել է օրվա խորհուրդը:
«Այսօր մայրենին այն միակ հզոր ուժն է, որն ապահովում է մեր աշխարհասփյուռ հայության միասնությունը, հանուն որի մենք դարեր շարունակ քայլել ենք դեպի ապագա: Մենք մեր ողջ գիտակցական կյանքի ընթացքում պիտի պայքարենք մեր լեզվի պահպանման և անաղարտության համար»,-նշել է նա:
Միջոցառման ընթացքում ուսանողները մայրենի լեզվին ձոնված բանաստեղծություններ են ասմունքել՝ ելույթներում կարևորելով մայրենի լեզվի դերը ազգապահպանման գործում:
«Լեզուն մեր ազգի օրհասական հենարանն ու գոյության առհավատչյան է: Լեզուն է գլխավոր երակը, որն իր հզորությամբ անհաղթելի է ժամանակի և վերջինիս ծնած պարգևի դեմ», - ասել է ուսանողուհի Տաթևիկ Ղահրամանյանը:
Մայրենի լեզվի միջազգային օրվա առթիվ ակադեմիկոս Ս. Աբրահամյանի անվան հայոց լեզվի ամբիոնը հայտարարել էր «Լավագույն ստեղծագործող» և «Լավագույն ասմունքող» մրցույթը: «Լավագույն ասմունքող» անվանակարգում 1-ին տեղը զբաղեցրել է Լինա Միրզոյանը, 2-րդը` Անուշ Պետրոսյանը, 3-րդը` Անահիտ Հովհաննիսյանը:
«Լավագույն ստեղծագործող» անվանակարգում 1-ին տեղն է զբաղեցրել Տաթևիկ Ղահրամանյանը, 2-րդը`Ասպրամ Ավանեսյանը:
Մրցույթներում հաղթողները ամբիոնի կողմից պարգևատրվել են պատվոգրերով: