Մարտի 19-ին Արցախի պետական համալսարանում կայացել է գիտխորհրդի նիստ, որի ընթացքում քննարկվել և հաստատվել են ուսումնական գործընթացին, կառավարմանը վերաբերող մի շարք հարցեր ու կարգեր:
Նախքան գիտխորհրդի օրակարգային հարցերին անցնելը՝ ռեկտոր Ա. Սարգսյանը համալսարանի պրոֆեսորադասախոսական կազմի և ուսանողության անունից շնորհավորել է պ.գ.թ., դոցենտ Վարդգես Սաֆարյանին 70-ամյակի առթիվ՝ շնորհելով նրան ԱրՊՀ 50–ամյակին նվիրված հուշամեդալ և արժանացնելով դրամական պարգևի:
«Վարդգես Սաֆարյանը երկար տարիներ ղեկավարել է ԱրՊՀ պատմության ամբիոնը: Նա ճանաչված գիտնական է ոչ միայն Արցախի, այլ նաև Հայաստանի Հանրապետությունում»,- նշել է ռեկտորն իր շնորհավորական խոսքում:
Ուսումնական աշխատանքների գծով պրոռեկտոր Գ. Սահակյանը օրակարգի առաջին հարցով ներկայացրել է առաջին ընթացիկ ստուգումների անցկացման նախապատրաստական աշխատանքները: Նրա խոսքով՝ ապահովված են անհրաժեշտ փաստաթղթերը, առարկայական ցանկերը և ժամանակացույցերը: Ոլորտի պատասխանատուն հորդորել է ամբիոնի վարիչներին մեկ անգամ ևս դասախոսներին հիշեցնել ընթացիկ ստուգումների անցկացման ու բողոքարկման կարգերը և առաջնորդվել սահմանված կարգով:
Գիտխորհրդի ընթացքում քննարկվել և հաստատվել են ԱրՊՀ պատվավոր կոչումներ շնորհելու, ԱրՊՀ 50-ամյակին նվիրված հուշամեդալով պարգևատրման, 2021-2022 ուսումնական տարվա բակալավրի, մագիստրատուրայի և ասպիրանտուրայի մասնագիտությունների և կրթական ծրագրերի ընդունելության նախատեսվող տեղերի ցանկը լիազոր մարմին ներկայացնելու մասին հարցերը:
Գիտխորհուրդը քննարկել և հաստատել է նաև «Արցախ. ներկան և ապագան» խորագրով ծրագիրը, ըստ որի նախատեսվում է առաջիկայում կազմակերպել հանդիպում-քննարկումներ հանրապետության պատասխանատու պաշտոնյաների, տարբեր գերատեսչությունների ղեկավարների, կառույցների ներկայացուցիչների հետ և հանրությանը հուզող տարբեր հարցերի պատասխաններ ստանալ անմիջապես առաջին ձեռքից: Մուտքը կլինի ազատ, և նման հանդիպումներին կարող են մասնակցել համալսարանի տարբեր աշխատակիցներ, դասախոսներ և ուսանողներ: