Ապրիլի 15-ին Արցախի պետական համալսարանում նշվել է աշխարհահռչակ գիտնական, լեզվաբան, անվանի մանկավարժ, ակադեմիկոս Հրաչյա Աճառյանի 145-ամյակը: Միջոցառումը նախաձեռնել է ակ. Ս. Աբրահամյանի անվան հայոց լեզվի ամբիոնի դասախոս, բ.գ.թ., դոցենտ Նունե Խաչատրյանը՝ «Հայոց լեզու և գրականություն» մասնագիտության 3-րդ կուրսի ուսանողների մասնակցությամբ: Միջոցառմանը ներկա են եղել ֆակուլտետի դեկան Լ. Մարգարյանը, ամբիոնի վարիչ Հ. Ղազարյանը, ամբիոնից դասախոսներ և ֆակուլտետի տարբեր կուրսերից ուսանողներ:
Գիտական ցերեկույթի ընթացքում ուսանողները հանդես են եկել զեկույցներով՝ ներկայացնելով աշխարհահռչակ գիտնականի, մեծ հայրենասերի կյանքն ու գիտական գործունեությունը, լեզվաբանական աշխատություններն ու հետաքրքիր դրվագներ լեզվաբանի կյանքից:
«Միջոցառման առանցքային նպատակն էր ոչ միայն ուսանողներին ծանոթացնել անվանի լեզվաբանի գիտական գործունեությանն ու լեզվաբանության համար մեծարժեք աշխատություններին, այլ նաև՝ Հ. Աճառյան մարդ-գիտնականի հետ»,- նշել է Ն. Խաչատրյանը՝ հավելելով, որ նման ձևաչափով միջոցառումները շարունակական բնույթ կկրեն՝ ունենալով և՛ ուսուցողական, և՛ դաստիարակչական նշանակություն: