Ապրիլի 16-ին Արցախի պետական համալսարանի պատմության և իրավագիտության ֆակուլտետում կազմակերպվել է «Պատմամշակութային արժեքների պահպանության հարցը» թեմայով կլոր սեղան-քննարկում, որը նախաձեռնել են «Իրավագիտություն» մասնագիտության առաջին կուրսի ուսանողները: Քննարկմանը մասնակցել են ֆակուլտետի դեկան Ա. Խաչատրյանը, պատմության և քաղաքագիտության ամբիոնի վարիչ Ն. Սարումյանը, ամբիոնից դասախոսներ և ուսանողներ:
«Մեր ժողովրդի ողջ պատմության ընթացքում պատմամշակութային արժեք ունեցող վայրերն ու դրանց պահպանությունը կարևոր նշանակություն են ունեցել: Մենք դատապարտում, պահանջում և կոչ ենք անում բռնազավթված տարածքներում գտնվող հուշարձանների նկատմամբ վանդալիզմի անհապաղ դադարեցում»,- նշել է պ.գ.թ., դոցենտ Ն. Սարումյանը:
Քննարկման ընթացքում ուսանողները հանդես են եկել զեկույցներով, որոնցում մասնավորապես ներկայացրել են միջազգային կազմակերպությունների դիրքորոշումը, հուշարձանների ու տեսարժան վայրերի պահպանման ուղղությամբ ներկայումս իրականացվող գործընթացն ու կատարել համապատասխան եզրահանգումներ:
«Հուշարձանները, լայն առումով, երկրի, ժողովրդի մշակութային ժառանգության մաս կազմող ստեղծագործություններ են: 2020թ. պատերազմի ընթացքում և դրանից հետո էլ Ադրբեջանի կողմից կոպտորեն խախտվել են միջազգային իրավունքի գրեթե բոլոր նորմերն ու մարդասիրական իրավունքները, վնասվել և նույնիսկ հիմնահատակ ոչնչացվել են մեր պատմական հուշակոթողները, ինչի համար, անշուշտ, պետք է պատասխանատվության ենթարկվեն»,- նշել է «Իրավագիտություն» մասնագիտության առաջին կուրսի ուսանող Արա Սարգսյանը:
«Հատկապես վերջին իրադարձություններից հետո մեզանից յուրաքանչյուրի համար օրակարգային է մշակութային ժառանգության պահպանումը, քանզի դրանք այն կոթողներն են, որոնք իրենց հնությամբ և արժեքով անգնահատելի ապացույցներ են մեր ժողովրդի ինքնության և բնիկ լինելու վերաբերյալ»,- նշել է «Իրավագիտություն» մասնագիտության առաջին կուրսի ուսանողուհի Աստղիկ Բաբայանը: