Ապրիլի 26-ին Արցախի պետական համալսարանի մանկավարժության և սպորտի ֆակուլտետում կազմակերպվել է կլոր սեղան-քննարկում «Կիրառի՛ր գիտելիքներդ և փորձառությունդ հանուն հայրենիքի զարգացման» թեմայով, որին հրավիրված էին ուսուցիչներ Ստեփանակերտի Ա. Ղուլյանի անվան N2 հիմնական և Շուշիի Խ. Աբովյանի անվան միջնակարգ դպրոցներից և դասախոսներ մանկավարժության ու հոգեբանության ամբիոնից: Քննարկումը նախաձեռնել էր մանկավարժության և հոգեբանության ամբիոնի ավագ դասախոսի պաշտոնակատար, մ.գ.թ. Արմինե Բաղդասարյանը:
Քննարկման նախաձեռնող Ա. Բաղդասարյանի խոսքով՝ նման հանդիպումների նպատակն է վեր հանել հետպատերազմական իրավիճակում դպրոցում առկա խնդիրները և դրանց լուծման համար գտնել ուղիներ՝ օգտագործելով նաև բուհի կողմից տրվող գիտական, մանկավարժական ու հոգեբանական աջակցությունը:
«Հասարակության կյանքը ձևավորող և իմաստավորող համակարգը առաջին հերթին կրթությունն է: Բոլորիս համար օրհասական այս օրերին մենք գտել ենք, որ նման հանդիպումները պետք է հաճախակի լինեն, քանի որ բուհ-դպրոց համագործակցությունը մշտապես եղել է արդիական, տեղին և պահանջված»,-նշել է նա:
«Պատերազմը խաթարեց նաև կրթության բնականոն գործընթացը՝ առաջացնելով մի շարք խնդիրներ, որոնք այսօր դեռևս շարունակում են տեղ գտնել մեր դպրոցներում: Այսօրվա քննարկման հիմնական նպատակն է միասին վերհանելու առկա խնդիրները և դրանց լուծման ուղիները՝ բուհ-դպրոց համագործակցության շրջանակում մասնակից դառնալով այդ խնդիրների հետագա վերլուծությանն ու լուծմանը»,- իր հերթին խնդիրների լուծմանն աջակցելու պատրաստակամություն է հայտնել մանկավարժության և սպորտի ֆակուլտետի դեկան Շ. Այդինյանը:
Կլոր սեղան-քննարկումը ընթացել է երեք հիմնական ուղղություններով՝ «Ինչպե՞ս ապահովել երեխաների ներգրավվածությունը ուսումնական գործընթացին», «Ինչպե՞ս աշխատել դժվարությամբ գրող և կարդացող երեխաների հետ», «Ինչպե՞ս աշխատել վարքային տարբեր դրսևորումներ ունեցող երեխաների հետ»: Քննարկման մասնակիցները ներկայացրել են անձնական փորձից օրինակներ և նշել, որ հետպատերազմյան իրականության առաջնային խնդիրներից է տեղահանված աշակերտների ակտիվ ներգրավվածությունը դասապրոցեսին, որի հիմնական պատճառներից մեկն էլ նրանց հուզական աշխարհի, առօրյա կյանքի խաթարումն է, որոնց վերականգնման ուղղությամբ տարաբնույթ աշխատանքներ են տարվում:
Ստեփանակերտի Ա. Ղուլյանի անվան N2 հիմնական դպրոցի օտար լեզվի ուսուցչուհի Գայանե Լալաբեկյանը կիսվել է իր անձնական օրինակով՝ նշելով.
«Ցանկացած մանկավարժ նախ և առաջ պետք է լինի հոգեբան, գերազանց տիրապետի այն բոլոր սկզբունքներին, որոնք նա կիրառում է դասապրոցեսի ժամանակ, պետք է սիրի, ճանաչի իր բոլոր աշակերտներին և, որ ամենակարևորն է, փոխադարձ վստահության սկզբունքով առաջնորդվի՝ ուսուցիչ-աշակերտ կապի ամրապնդման գործընթացում»:
ԱրՊՀ ՈՒՇՀՀՏԱԳ պրոռեկտոր, հ.գ.թ., դոցենտ Վ. Յարամիշյանը ողջունելի է համարել նման ձևաչափով միջոցառման կազմակերպումը և իր խոսքում կարևորել նման փոխայցելությունները պարբերական դարձնելը՝ արդյունքում ձևավորելով նաև փոխադարձ պատասխանատվության մեխանիզմը:
«Բուհ-դպրոց կապի ամրապնդումը մեր համալսարանի ռազմավարական ծրագրի կարևոր նախադրյալներից մեկն է: ԱրՊՀ-ում գործում է հոգեբանական կենտրոն, որի գործունեության շրջանակներում կարող ենք կազմակերպել պրակտիկ դասընթացներ, որին կմասնակցեն նաև աշակերտներ, ուսանողներ, ուսուցիչներ»,- նշել է Վ. Յարամիշյանը՝ հավելելով, որ անհրաժեշտ է համարում քննարկման արդյունքում ունենալ ընդհանուր եզրակացություն և հանդես գալ գործնական առաջարկներով:
Քննարկման ավարտին մասնակից ուսուցիչներին ԱրՊՀ կողմից տրամադրվել է մասնագիտական գրականություն:
