Հունիսի 7-ին Արցախի պետական համալսարանի հեռակա ուսուցման համակարգում սովորող ուսանողների հետ հանդիպում է ունեցել ՈՒՇՀՀՏԱ գծով պրոռեկտոր Վ. Յարամիշյանը: Հանդիպմանը ներկա էին տարբեր մասնագիտություններով սովորող ուսանողներ:
Վ. Յարամիշյանը ներկաների հետ քննարկել է հեռակա ուսուցման գործընթացի, ուսանողների իրավունքների և պարտականությունների, ուսանողական ինքնավար կառույցների, դրանց անդամակցելու և համալսարանական կյանքի հետ կապված մի շարք հարցեր:
ՈՒսանողները ծանոթացել են համալսարանում ուսանողների հետ տարվող աշխատանքների գծով համապատասխան ստորաբաժանումներին, իրազեկվել, թե ինչպես կարող են ստանալ իրենց հուզող հարցերի պատասխաններն ու հանդես գալ առաջարկություններով:
Պրոռեկտոր Վ. Յարամիշյանը, կարևորելով հեռակա ուսուցման համակարգի ուսանողների դերը համալսարանի զարգացման գործում, կոչ է արել ներկաներին իրենց անմիջական մասնակցությունն ու ներգրավվածությունն ունենալ համալսարանական միջոցառումներին՝ ապահովելով նաև ակտիվ հետադարձ կապի սկզբունքը:
«Ուսանողների առաջարկություններն ու կարծիքները միշտ էլ բուհի ղեկավարության ուշադրության կենտրոնում են եղել: Թե՛ առկա, թե՛ հեռակա համակարգում սովորող ուսանողների համար ստեղծված են հավասար պայմաններ, ուստի ձեզնից կախված է լինել ակտիվ և նախաձեռնող»,-իր խոսքում նշել է Վ. Յարամիշյանը:
Հանդիպման ընթացքում ուսանողները ծանոթացել են նաև ուսանողական ինքնավար կառույցների ղեկավարների հետ, հնչեցրել իրենց հուզող հարցերն ու քննարկել հեռակա ուսուցման համակարգին վերաբերող մի շարք հարցեր: