Սեպտեմբերի 20-ից 23-ը ԱՀ Ազգային ժողովի, ԿԳՄՍ նախարարության և ՀՀ ԳԱԱ նախաձեռնությամբ կազմակերպվում է միջազգային գիտաժողով ՝ նվիրված Արցախի Հանրապետության և Հայաստանի (երրորդ) Հանրապետության հռչակման 30-րդ տարեդարձին: Գիտաժողովի լիագումար նիստը մեկնարկել է սեպտեմբերի 20-ին ԱՀ ԱԺ նիստերի դահլիճում, որից հետո աշխատանքները շարունակվել են մասնախմբերում: Գիտաժողովի մասնախմբային նիստ է կայացել նաև Արցախի պետական համալսարանում, որին ներկա էին նաև բուհի ուսանողներ: Մասնախմբային նիստը նախագահել են ԵՊՀ մշակութաբանության ամբիոնի վարիչ, պ.գ.դ., պրոֆեսոր Համլետ Պետրոսյանը և ԱրՊՀ պատմության և իրավագիտության ամբիոնի ավագ դասախոս Լեռնիկ Հովհաննիսյանը: Գիտաժողովի ընթացքում մասնակիցները հանդես են եկել զեկույցներով, որոնք վերաբերում էին ԱՀ և ՀՀ պատմությանն ու մշակույթին:
ԵՊՀ մշակութաբանության ամբիոնի վարիչ, պ.գ.դ., պրոֆեսոր Համլետ Պետրոսյանը ներկայացրել է Արցախի հնագիտական հետազոտության հիմնական արդյունքներն անկախության տարիներին և խոսել ներկա մարտահրավերների մասին:
«Այսօր մենք փորձում ենք տարբեր միջոցներով պահպանել և պաշտպանել Արցախի մշակութային ժառանգությունը և այդ միջոցներից մեկն էլ «Արցախի մշակութային ժառանգության մշտադիտարկում» նախագիծն է»,- նշել է Հ. Պետրոսյանը:
Անկախության տարիներին Արցախի գրական կյանքի մասին խոսել է ՀՀ ԳԱԱ, պատմության ինստիտուտի աշխատող, բ.գ.դ., պրոֆեսոր Դավիթ Գասպարյանը, ում խոսքով Արցախի գրողների միությունը առայսօր էլ շարունակում է մեծածավալ գործունեություն ծավալել:
Զեկույցներով հանդես են եկել նաև ՌԴ Պետերբուրգի հայ համայնքի նախագահի տեղակալ Վահան Բաբախանյանը, ՀՀ ԳԱԱ Նոր պատմության բաժնի գիտաշխատող, պ.գ.թ. Հասմիկ Ամիրջանյանը, ԱրՊՀ ավագ դասախոս Լեռնիկ Հովհաննիսյանը և ԱՀ մշակույթի վաստակավոր գործիչ, պատմաբան-հուշարձանագետ Սլավա Սարգսյանը:
Միջազգային գիտաժողովի աշխատանքներն ամփոփվելու են սեպտեմբերի 23-ին ՀՀ ԳԱԱ պատմության ինստիտուտում:
