Սեպտեմբերի 21-ին Արցախի պետական համալսարանում դասախոսությամբ հանդես է եկել ԵՊՀ միջազգային հարաբերությունների ֆակուլտետի քաղաքական գիտության պատմության և տեսության ամբիոնի պրոֆեսոր, փ.գ.դ. Հենզել Մանուչարյանը: Նախքան դասախոսության մեկնարկը՝ Հ. Մանուչարյանը հանդիպել է համալսարանի ռեկտոր Արմեն Սարգսյանի հետ: Ռեկտորը շնորհակալություն է հայտնել նրան՝ ԱրՊՀ այցելելու և Արցախի մայր բուհի հետ համագործակցելու, ուսումնամեթոդական աջակցություն ցուցաբերելու համար:
Պատմության և իրավագիտության, ինչպես նաև բանասիրական ֆակուլտետների ուսանողության համար հանդես գալով «Արցախի հարցը միջազգային իրավունքի համատեքստում» խորագրով դասախոսությամբ՝ բանախոսը անդրադարձել է ստեղծված իրավիճակից դուրս գալու ուղիներին, ներկայացրել առկա խնդիրների լուծման իր տեսակետը:
Հենզել Մանուչարյանի խոսքով՝ թեման արդիական հնչեղություն և կենսական նշանակություն ունի, քանի որ Արցախում այսօր ունենք նաև տարածքային ամբողջականության խնդիր:
«Մեր ժողովուրդը ճգնաժամային պահեր շատ է ապրել և նման իրավիճակներից դուրս գալու համար մենք պետք է համախմբվենք և միասնական լինենք»,- նշել է Հ. Մանուչարյանը՝ հավելելով, որ Արցախը բոլորիս հայրենիքն է և Արցախի առջև ծառացած խնդիրները ևս բոլորիս խնդիրներն են: Ըստ նրա՝ առկա խնդիրների լուծման համար կարևոր է մեր ժողովրդի միասնական լինելն ու համախմբվածությունը:
Դասախոսության ընթացքում ուսանողները բանախոսին են հղել իրենց հուզող հարցերն ու ծավալել ակտիվ քննարկում:
