Արցախի Հանրապետության և Հայաստանի (երրորդ) Հանրապետության հռչակման 30-րդ տարեդարձին նվիրված միջազգային գիտաժողովի շրջանակներում Արցախի պետական համալսարան է այցելել Ղրիմի դաշնային համալսարանի պրոֆեսոր, փ.գ.դ., փիլիսոփայության ֆակուլտետի դեկան Օլեգ Գաբրիելյանը և ԱրՊՀ ուսանողության համար հանդես եկել դասախոսությամբ:
Նախքան դասախոսության մեկնարկը՝ պրոֆեսոր Օլեգ Գաբրիելյանը հանդիպել է ԱրՊՀ ռեկտոր Արմեն Սարգսյանի հետ: Հանդիպմանը, որին ներկա էր նաև ԱՀ ԿԳՄՍ նախարար Լուսինե Ղարախանյանը, քննարկվել են կրթությանն ու գիտությանը վերաբերող, հետագա համագործակցությունն ուղենշող հարցեր: Ռեկտոր Արմեն Սարգսյանը շնորհակալություն է հայտնել Օլեգ Գաբրիելյանին՝ ԱրՊՀ այցելելու համար՝ կարևորելով սփյուռքահայության դերն ու ներդրումը հայրենիքի զարգացման գործում: Իր հերթին Օլեգ Գաբրիելյանը պատրաստակամություն է հայտնել փոխգործակցության և ԱրՊՀ-ին ուսումնամեթոդական աջակցություն ցուցաբերելու գործում՝ կարևորելով Սփյուռքի կենսունակության պահպանման հարցում հայրենիքի հետ մշտական կապի մեջ գտնվելը:
Պրոֆեսոր Օլեգ Գաբրիելյանը ԱրՊՀ պատմության և իրավագիտության, ինչպես նաև բանասիրական ֆակուլտետի ուսանողության համար հանդես է եկել բարձրագույն կրթության զարգացման միտումներին վերաբերող թեմայով դասախոսությամբ, որի ընթացքում նա անդրադարձել է բարձրագույն կրթության արդիական խնդիրներին, կրթության հետ կապված հումանիտար-սոցիալական, ինժեներական, ՏՏ ոլորտներին, տեղեկատվական պատերազմներին:
Խոսելով տեխնոլոգիական առաջընթացին համաքայլ կրթություն ունենալու անհրաժեշտությունից՝ նա կարևորել է երիտասարդության ներուժը՝ ընդգծելով այն հանգամանքը, որ երիտասարդ սերունդն աչքի է ընկնում տեղեկատվական տեխնոլոգիաներից հմտորեն օգտվելու կարողություններով, իսկ ավագ սերունդը՝ գիտելիքով ու փորձով:
«Շատ կարևոր է երիտասարդ և ավագ սերունդների ունեցած առավելությունների համադրումը արդյունավետության հասնելու համար»,-ընդգծել է Օլեգ Գաբրիելյանը:
Բանախոսը պատասխանել է նաև ուսանողների հարցերին: