Հոկտեմբերի 8-ին Արցախի պետական համալսարանի պատմության և քաղաքագիտության ամբիոնի նախաձեռնությամբ կայացել է հանդիպում ուսանողների հետ: Հանդիպման առանցքային նպատակն էր ուսանողների հետ համալսարանում «Պատմաբանների ակումբ» բացելու հարցի քննարկումն ու հարցի վերաբերյալ համատեղ որոշում կայացնելը: Հանդիպմանը ներկա էին ֆակուլտետի դեկան Ա. Խաչատրյանը, ամբիոնից դասախոսներ և տարբեր կուրսերից ուսանողներ:
Պատմության և քաղաքագիտության ամբիոնի վարիչ, պ.գ.թ., դոցենտ Ն. Սարումյանի խոսքով՝ տեղեկատվական դաշտում առկա խեղաթյուրումների դեմ պայքարելու մի միջոց կարող է հանդիսանալ նմանօրինակ ակումբի բացումն ու հետագա ակտիվ գործունեությունը:
«Ակումբի շրջանակներում ձեզնից յուրաքանչյուրը, Արցախի բռնազավթված բնակավայրերի, իր հայրենի գյուղի, պատմամշակութային վայրերի և կոթողների մասին հոդված գրելով, իր ներդրումը կունենա տեղեկատվական դաշտում առկա պայքարում հաղթանակ ունենալուն: Մեր ծավալած գործունեությունը աշխարհին պիտի ապացուցի, որ Արցախը հայկական է»,- նշել է Ն. Սարումյանը՝ հավելելով, որ ակումբի գործունեությունը հայրենասիրական և ազգապահպան նպատակ է հետապնդելու:
Հանդիպման ընթացքում, ուսանողների միաձայն որոշմամբ, հավանության է արժանացել «Պատմաբանների ակումբ» ունենալու առաջարկը: Այսուհետ ԱրՊՀ-ում կգործի «Պատմաբանների ակումբ»-ը, որը, ըստ Ն. Սարումյանի, ակտիվ գործունեություն է ծավալելու սոցիալական ցանցերում՝ պատմական փաստերը տարբեր լեզուներով աշխարհին ներկայացնելու նպատակով:
