ԱրՊՀ ռեկտոր Արմեն Սարգսյանը հոկտեմբերի 13-ից 15-ը աշխատանքային այցով ՀՀ-ում էր։ Այցի ընթացքում ռեկտորը մի շարք հանդիպումներ է ունեցել ՀՀ ԿԳՄՍ նախարար Վահրամ Դումանյանի, ՀՀ ԳԱԱ լեզվի ինստիտուտի տնօրեն Վիկտոր Կատվալյանի, ԵՊՀ ղեկավարության հետ, մասնակցել ՀԲԸՄ ընդունելությանը, որը կազմակերպվել էր ի նշանավորումն Հայաստանի անկախության 30-ամյակի։ Հանդիպումների ընթացքում քննարկվել են Արցախի պետական համալսարանում բարձրագույն կրթության և գիտության զարգացմանը վերաբերող հարցեր։
ԵՊՀ ռեկտորի ժ.պ. Հովհաննես Հովհաննիսյանը և Արցախի պետական համալսարանի ռեկտոր Արմեն Սարգսյանը հոկտեմբերի 15-ին ԵՊՀ-ում ստորագրել են երկու բուհերի միջև համագործակցության նոր պայմանագիր՝ զարգացնելու կրթական, գիտահետազոտական և ուսումնամեթոդական ոլորտներում առկա փոխգործակցությունը:
Ըստ նոր կնքված պայմանագրի՝ երկու բուհերը մշակելու և կյանքի են կոչելու համատեղ ծրագրեր, իրականացնելու են դասախոսների և ուսանողների ակադեմիական փոխանակում, կազմակերպելու են տեղեկատվական, մարզական ու մշակութային միջոցառումներ:
ԱրՊՀ ռեկտոր Արմեն Սարգսյանը, կարեւորելով պայմանագրի ստորագրումը, նշել է, որ Երևանի պետական համալսարանը ոչ միայն Հայաստանի, այլև ողջ հայության Մայր բուհն է, և պատահական չէ, որ 51-ամյա ԱրՊՀ-ն առ այսօր զգում է ԵՊՀ-ի աջակցության կարիքը:
Նա տեղեկացրեց, որ երկու բուհերի միջև համագործակցության հուշագիր կնքվել էր դեռևս 2014 թվականին 5 տարի ժամկետով. «Հաշվի առնելով համավարակը, այնուհետև 44-օրյա պատերազմը՝ նոր պայմանագիր կնքելու հնարավորություն չէր ստեղծվել: Այսօր արդեն այն իրողություն է»:
ԵՊՀ ռեկտորի ժ.պ. Հովհաննես Հովհաննիսյանն էլ փաստեց, որ Մայր բուհը կանգնել ու մշտապես կանգնած է լինելու Արցախի և Արցախի պետական համալսարանի կողքին. «Մեր միջև առկա կապերն ամուր են, բայց մենք դրանք էլ ավելի կամրացնենք՝ ցույց տալու բոլորին, որ մենք կանք և կլինենք»:
Կնքված նոր պայմանագրի արդյունքում ԵՊՀ-ն տրամադրելու է գիտական, մասնագիտական գրականություն, պարբերականներ և այլ նյութեր, աջակցելու է ԱրՊՀ մասնագետների պատրաստման, պրոֆեսորադասախոսական կազմի համալրման, ատենախոսությունների պաշտպանության, ֆակուլտետների և ամբիոնների փոխգործակցության կազմակերպման գործընթացներին և այլ աշխատանքներին:
ԱրՊՀ ռեկտորի աշխատանքային հանդիպումները գիտակրթական հաստատությունների պատասխանատուների հետ շարունակվելու են՝ ԱրՊՀ համագործակցային շրջանակներն ընդլայնելու, բարձրագույն կրթության շարունակական բարելավման ու զարգացման նպատակով։
18 Հոկտեմբեր 2021
