Հոկտեմբերի 29-ին տեղի է ունեցել պատմության և իրավագիտության ֆակուլտետի մեծ խորհրդի նիստը, որի ընթացքում դեկան Արմինե Խաչատրյանը ներկայացրել է 2020-2021 ուստարում ֆակուլտետի կատարած աշխատանքի մասին հաշվետվություն: Նիստին ներկա էին ռեկտոր Արմեն Սարգսյանը, պրոռեկտորներ, խորհրդի անդամներ:
Նիստը մեկնարկել է մեկ րոպե լռությամբ՝ ի հիշատակ պատերազմում նահատակված ուսանողների:
Պատմության և իրավագիտության ֆակուլտետում գործում են 3 ամբիոններ՝ պատմության և քաղաքագիտության, իրավունքի, կերպարվեստի: Ֆակուլտետի դասախոսները տպագրել են հոդվածներ, մենագրություններ, մասնակցություն հանդես բերել միջազգային գիտաժողովների:
Դեկանի խոսքով՝ պատմության և քաղաքագիտության ամբիոնն իր գիտական ուսումնասիրությունները և ուսումնական դասընթացները ծավալել և այժմ էլ ծավալում է հայոց պատմության, ազգագրության, հնագիտության և ընդհանուր պատմության մի շարք հիմնախնդիրների ուսումնասիրության և պատմության դասավանդման մեթոդիկայի ուղղությամբ:
Իրավունքի ամբիոնն իր գիտական ուսումնասիրություններն ու ուսումնական դասընթացները ծավալել է սահմանադրական, վարչական, քրեական, քաղաքացիական իրավունքի, դատավարության ուղղություններով:
Հաշվետու ժամանակաշրջանում իրավունքի ամբիոնը շարունակել է համագործակցել ՀՀ առաջատար բուհերի հետ: Ամբիոնի դասախոս Տաթևիկ Գևորգյանը Երևանի պետական համալսարանում պաշտպանել է թեկնածուական ատենախոսություն ԺԲ.00.05 մասնագիտությամբ:
Կերպարվեստի ամբիոնում իրականացվել է ակադեմիական հաջողված աշխատանքների ցուցադրում (գծանկար, գունանկար, կոմպոզիցիա), դասախոսների աշխատանքների ցուցադրում բաժնի ուսանողներին: Կատարվել են թեմատիկ աշխատանքներ` նվիրված ԱրՊՀ 50-ամյակին (գրաֆիկա, քանդակ, գունանկար): Կազմակերպվել են միասնական ցուցահանդեսներ:
Դեկան Ա. Խաչատրյանը ներկայացրել է նաև ֆակուլտետում կատարված ուսումնամեթոդական աշխատանքները, ուսանողների գիտական աշխատանքը, դաստիարակչական ու կրթական ժամանցի ուղղությամբ կատարված միջոցառումները: Խոսելով ֆակուլտետի ուժեղ և թույլ կողմերի մասին՝ Ա. Խաչատրյանը նշել է. «Ֆակուլտետի ուժեղ կողմը մեր գնահատմամբ ուսանող- դասախոս-ամբիոն-դեկանատ փոխհամագործակցության ամուր հենքն է, ուսանողների ներգրավվածությունը համալսարանական, արտահամալսարանական միջոցառումներին, ուսման գործընթացի բարելավմանը: Թույլ կողմը՝ փոխադարձ դասալսումների և քննարկումների, առաջավոր մանկավարժական փորձի ներդրման ոչ բավարար մակարդակը»:
Հաշվետվությունը գնահատող ելույթներով հանդես են եկել ֆակուլտետի դասախոսներ:
Խորհուրդը պատմության և իրավագիտության ֆակուլտետի 2020-2021 ուստարում կատարած աշխատանքի մասին հաշվետվությունը գնահատել է բավարար:
