Փետրվարի 21-ին ԱրՊՀ ռեկտոր Արմեն Սարգսյանը հանդիպել է ուսանողական ինքնավար կառույցների ակտիվի հետ: Հանդիպմանը մասնակցում էին նաև ՈւՇՀՀՏԱԳ պրոռեկտոր Վիտյա Յարամիշյանը և ուսանողների հետ տարվող աշխատանքների բաժնի ներկայացուցիչներ:
Կարևորելով օրվա խորհուրդը և գիրք նվիրելու ավանդույթը՝ ռեկտոր Ա. Սարգսյանը հանդես է եկել լեզվին նվիրված դասախոսությամբ՝ անդրադառնալով մայրենի լեզվի պատմական ու քաղաքական դերին, լեզվի զարգացման պատմությանը, առկա խնդիրների և դրանց լուծման ուղիներին։ Ռեկտորը նաև արժեքավոր գրքեր է նվիրել ուսանողական ինքնավար կառույցների ակտիվ ուսանողներին:
«Հայոց գրերն ու մայրենի լեզուն այն գերակա արժեքներն են, որոնց շնորհիվ դարերի ընթացքում պատմական ամենաբարդ ժամանակաշրջաններում հայ ժողովուրդը կարողացել է պահպանել իր ազգային ինքնությունը»,-ընդգծել է ռեկտորը:
Հանդիպման ընթացքում ուսանողները հանդես են եկել ելույթներով, ասմունքով: