Ուսանողական առօրյան ակտիվ ու բովանդակալից դարձնելու նպատակով բուհում հաճախակի են կազմակերպվում կրթագիտական միջոցառումներ: Այսօր տնտեսագիտության ֆակուլտետի ուսանողական խորհրդի կողմից կազմակերպված հերթական միջոցառումը նպատակ ուներ ուսանողների իմացությունները տնտեսագիտությունից ստուգել «Տնտեսագիտական այլ կերպ» խաղ-մրցույթի միջոցով, որին մասնակցել են ֆակուլտետի ուսանողներից բաղկացած տարբեր թիմեր:
Մրցույթին ներկա էին նաև տնտեսագիտության ֆակուլտետի դեկան, տ.գ.թ., դոցենտ Ռուզաննա Մանգասարյանն ու նույն ֆակուլտետի ֆինանսահաշվային ամբիոնի վարիչ, տ.գ.թ., դոցենտ Նարինե Մելքումյանը։
«Նման միջոցառումների կազմակերպումը արդյունավետ է երկու տեսանկյունից՝ և՛ ուսանողների կողմից մասնագիտական հիմնահարցերի ճիշտ մոտեցումների ցուցաբերման, և՛ տրամաբանական մտածողության տեսանկյունից, բացի այդ, այն համախմբում է ֆակուլտետի բոլոր ուսանողներին՝ հնարավորություն տալով նաև առաջին կուրսեցիներին ներգրավել ուսանողական ակտիվ կյանքին։ Կարծում եմ՝ ուսխորհրդի կողմից կազմակերպվող առաջիկա միջոցառումները և՛ բովանդակային, և՛ նպատակային առումով պետք է ավելի մեծ շրջանակներ ընդգրկեն»,-նշել է ֆակուլտետի դեկան Ռուզաննա Մանգասարյանը՝ պատվոգրերով պարգևատրելով մրցույթի արդյունքում մրցանակային տեղեր զբաղեցրած թիմերին: