Մարտի 5-ին ԱրՊՀ-ում բնագիտական ֆակուլտետի մաթեմատիկայի և ֆիզիկայի ամբիոնի նախաձեռնությամբ տեղի է ունեցել օլիմպիադա «Մաթեմատիկա» առարկայից, որին մասնակցել է հանրակրթական դպրոցների 9-12-րդ դասարանների մոտ երեք տասնյակ աշակերտ։ Օրը պատահական չէր ընտրված. մարտ ամսվա առաջին շաբաթ օրը նշվում է որպես մաթեմատիկի օր։ Նախքան օլիմպիադայի մեկնարկը՝ ուսանողական խորհրդի կողմից միջոցառմամբ արժևորվել է օրվա խորհուրդը, մաթեմատիկայի տեղն ու դերը ժամանակակից աշխարհում։
«Առաջին հայացքից կարող է թվալ, թե մաթեմատիկան չոր և անհետաքրքիր գիտություն է: Բայց սա ամենահին և հետաքրքիր գիտություններից մեկն է: Մաթեմատիկան զարգացնում է միտքը և օգնում գտնել լուծումներ բարդ խնդիրների համար: Եթե ցանկանում եք հաջողակ մարդ լինել և լավ աշխատանք ունենալ, ապա ձեզ հարկավոր է մաթեմատիկա սովորել»,-միջոցառմանն իր ելույթում նշել է «Մաթեմատիկա» կրթական ծրագրի ուսանողուհի Ռուզաննա Սահակյանը։
Մաթեմատիկայի և ֆիզիկայի ամբիոնի կողմից փետրվարի 26-ին էլ կազմակերպվել էր օլիմպիադա «Ֆիզիկա» առարկայից։
Ամբիոնի վարիչ, ֆ.մ.գ.թ. Գայանե Պետրոսյանի խոսքով՝ օլիմպիադաներին հիմնականում մասնակցում են տվյալ առարկաներից խորը գիտելիքներ ունեցող աշակերտները, հետևաբար օլիմպիադաների անցկացման արդյունքում հնարավոր է պարզել, թե դպրոցական դասընթացի որ բաժիններն են ավելի դժվար յուրացվում աշակերտների կողմից, ըստ այդմ էլ ուղենշել հետագա աշխատանքները։
«Օլիմպիադաների կազմակերպման նպատակն է մեծացնել աշակերտների հետաքրքրությունը մաթեմատիկա և ֆիզիկա առարկաների նկատմամբ, ինչպես նաև ամրապնդել բուհ-դպրոց կապը»,-նշել է նա՝ հավելելով, որ առաջիկայում կամփոփվեն արդյունքները և կպարգևատրվեն ինչպես այս, այնպեսև փետրվարի 26-ին ֆիզիկայից կազմակերպված օլիմպիադայում մրցանակային տեղեր զբաղեցրած աշակերտները։
07 Մարտ 2022
