Մայիսի 21-ին Ստեփանակերտում կայանալիք Արամ Մերանգուլյանի անվան ժողովրդական գործիքների վաստակավոր անսամբլի համերգի շրջանակում այս օրերին Արցախում են նաև Հայաստանի Հանրային ռադիոյի ներկայացուցիչներ:
Մայիսի 20-ին, Արցախի պետական համալսարան են այցելել Եվրասիա միջազգային համալսարանի «Լրագրության և մեդիա կառավարման» կրթական ծրագրի ղեկավար, Հայաստանի Հանրային ռադիոյի հաղորդավար Տիգրան Հարությունյանn ու ԵՄՀ PR թիմի ղեկավար, հանրային ռադիոյի թվային հարթակների ղեկավար Էդգար Ամիրխանյանը և հանդիպում ունեցել «Լրագրություն» մասնագիտությամբ սովորող ուսանողների հետ:
Հանդիպման ընթացքում ոլորտի մասնագետները ուսանողների հետ կիսվել են իրենց փորձով, փոխանցել մասնագիտական հմտություններ, հետաքրքրվել առկա խնդիրներով և պատրաստակամություն հայտնել մասնագիտական աջակցություն ցուցաբերելու:
Տիգրան Հարությունյանի խոսքով՝ այցի նպատակներից է նաև ակտիվացնել Արցախի պետական համալսարանի հետ ԵՄՀ համագործակցությունը:
«Լրագրողի մասնագիտությունը մեր օրերում շատ պահանջված մասնագիտություն է: Առավել կարևորում եմ հենց Արցախի Հանրապետության դեպքում, որովհետև Արցախի ձայնը պիտի լսելի դարձնեն այդ թվում նաև պատրաստված լրագրողները, ովքեր, լինելով այստեղի քաղաքացի, այստեղի արժեքների և ավանդույթների կրողը, պիտի կարողանան ոչ միայն այստեղի բնակչությանը ճիշտ խոսք, ճիշտ ինֆորմացիա փոխանցել, այլև՝ աշխարհին ներկայանալ որպես Արցախի Հանրապետության քաղաքացի»,-նշել է Տիգրան Հարությունյանը՝ կարևորելով «Լրագրություն» մասնագիտության անհրաժեշտությունը Արցախի պետական համալսարանում:
20 Մայիս 2022
