Հունիսի 13-ին ԱրՊՀ է այցելել Հայաստանի հաշվապահների և աուդիտորների ասոցիացիայի (ՀՀԱԱ) խորհրդի անդամ, «ՓԻ-ԷՅՉ-ՓԻ » ՓԲԸ տնօրեն, տնտեսագետ Հովհաննես Պետրոսյանը և հանդիպում ունեցել տնտեսագիտության ֆակուլտետի դասախոսների, ուսանողության հետ:
Հանդիպման ընթացքում Հ. Պետրոսյանը ուսանողներին է ներկայացրել հաշվապահական հաշվառման և աուդիտորական գործունեության վերջին զարգացումները, որոնք տեղի են ունեցել ՀՀ-ում և աշխարհում, որոշակի տեղեկատվություն է փոխանցել նաև ֆինանսական հաշվետվությունների միջազգային չափանիշներով զարգացումների մասին:
Բանախոսի կարծիքով՝ հանդիպումն ավելի շատ ոլորտի վերաբերյալ տեղեկատվություն ներկայացնելն էր: Ձեռք է բերվել պայմանավորվածություն հետագայում ևս նման հանդիպումները շարունակական դարձնելու վերաբերյալ:
Թեմաները կառաջարկեն ուսանողները, որոնց շուրջ առաջիկայում կմեկնարկի դասախոսությունների շարք:
«Որպես Արցախը սիրող մարդ՝ Արցախի պետական համալսարանում դասախոսություններով հանդես գալն իմ անձնական նախաձեռնությունն է: Փորձում եմ Արցախին այս կերպ իմ աջակցությունը ցուցաբերել: Հայաստանի հաշվապահների և աուդիտորների ասոցիացիան ներկայումս դասագրքեր է մշակում, որը մենք նախատեսում ենք տրամադրել բուհերին, անպայման ԱրՊՀ-ն ներառված կլինի այդ բուհերի ցանկում:
Գաղափար կա ասոցիացիայի կողմից անցկացվող որակավորման դասընթացները հեռավար կազմակերպել նաև ԱրՊՀ մասնագետների համար»,-նշել է Հ. Պետրոսյանը՝ հավելելով, որ իրենց կողմից ուսանողությանը տրամադրվող գիտելիքներն ու տեղեկատվությունը հետբուհական զարգացումների վերաբերյալ են, որոնք ներառված չեն բուհերի ուսումնական պլաններում:
13 Հունիս 2022
