Նոյեմբերի 7-ին տեղի ունեցավ ԱրՊՀ տնտեսագիտության ֆակուլտետի մեծ խորհրդի նիստը, որի ընթացքում դեկան, տ.գ.թ., դոցենտ Ռուզաննա Մանգասարյանը ներկայացրեց 2021-2022 ուսումնական տարվա գործունեության մասին հաշվետվություն: Հաշվետվությանը ներկա էին ռեկտոր Արմեն Սարգսյանը, պրոռեկտորներ, խորհրդի անդամներ:
Ֆակուլտետի դեկանը ներկայացրել է հաշվետու տարում ուսումնական գործընթացի, գիտահետազոտական, կազմակերպչական, ուսանողների հետ տարվող բարոյահոգեբանական աշխատանքների ուղղությամբ իրականացված աշխատանքները:
2021-2022 ուսումնական տարում ֆակուլտետում ուսումնագիտական գործունեությունն իրականացվել է երկու ամբիոններում ՝ «Տնտեսագիտության տեսության և կառավարման» և «Ֆինանսահաշվային»: Ֆակուլտետն առկա և հեռակա ուսուցման համակարգերում ունի ընդհանուր 301 ուսանող:
Ռ. Մանգասարյանի խոսքով՝ ֆակուլտետն իր գիտական ուսումնասիրությունները և ուսումնական դասընթացները ծավալել և այժմ էլ ծավալում է Արցախի Հանրապետության սոցիալ -տնտեսական հիմնախնդիրների շուրջ՝ կազմակերպելով գիտական բանավեճեր, կլոր սեղաններ, գիտական ընթերցումներ, ներկայացնելով գիտական հոդվածներ, տարաբնույթ միջոցառումներ:
Հաշվետվության ընթացքում դեկանը ներկայացրել է նաև ֆակուլտետի ինքնավերլուծություն՝ ուժեղ և թույլ կողմերով, նշել ձեռքբերումներն ու առկա խնդիրները:
«Ամբիոնի դասախոսները տպագրել են հոդվածներ, կազմել են մասնագիտական դասընթացների ուղեցույցներ, ծրագրեր, թեստեր, էլեկտրոնային տարբերակով դասախոսություններ: Իրականացվել են արդյունավետ և թափանցիկ վերահսկողական աշխատանքներ, և ամրապնդվել է կարգապահությունը: Բուհ-գործատու համագործակցությունն է ամրապնդվել, որին նպաստել են այդ ուղղությամբ տարաբնույթ միջոցառումների իրականացումը: Հանրապետության սոցիալ-տնտեսական զարգացման և կրթական համակարգին առնչվող հիմնախնդիրների շուրջ ֆակուլտետը ծավալել է գիտահետազոտական աշխատանքներ»,-հաշվետու տարվա ձեռքբերումների մասին նշել է դեկանը՝ հավելելով դրանց նաև ներհամալսարանական և արտահամալսարանական գիտահետազոտական միջոցառումներին ուսանողների ակտիվ և պատշաճ մակարդակով մասնակցության ապահովումը, ՄԿԾ-ների կատարելագործման ուղղությամբ իրականացված աշխատանքները և դրանցում ներառված մասնագիտական դասընթացներից ստացված գիտելիքների ամփոփումը գիտական ընթերցումներով, մրցույթներով, խմբային աշխատանքներով:
Առկա խնդիրների մասին խոսելով՝ դեկան Ռ. Մանգասարյանը դրանց լուծման համար անհրաժեշտ է համարում դասախոսական կազմի մասնագիտական կարողությունների շարունակական բարելավումը, մենագրությունների, ուսումնական ձեռնարկների, հոդվածների տպագրության աճը, էլեկտրոնային դասախոսությունների ժողովածուների պատրաստումը, հանրապետությունից դուրս վերապատրաստման դասընթացների մասնակցելը, դասավանդման, ուսումնառության և հետազոտության փոխկապակցման ժամանակակից կրթափորձի մշտապես ուսումնասիրությունը ՝ բակալավրի և մագիստրոսի կրթական ծրագրերում կիրառելու նպատակով, դասախոսական կազմի երիտասարդացումը /դասախոսների միջին տարիքը 48 է/, ֆակուլտետի շրջանավարտների մեծամասնությունը նախընտրում է գործունեության այլ ոլորտներ՝ հաշվի առնելով գիտական գործունեության բարդ և աշխատատար լինելը, կրթական գործընթացում տեղեկատվական տեխնոլոգիաների ընդլայնված և արդյունավետ օգտագործման ապահովումը, պրոֆեսորադասախոսական անձնակազմի խրախուսման արդյունավետ համակարգի ներդրումը, արտաքին համագործակցության շրջանակում կապերի ակտիվացումը:
Հաշվետվության շուրջ ելույթներ են ունեցել պրոռեկտոր Գեորգի Սահակյանը, ամբիոնների վարիչները, դասախոսներ և ուսանողներ՝ բարձր գնահատելով կատարված աշխատանքը՝ ընդգծելով, որ ֆակուլտետն, ընդհանուր առմամբ, հաշվետու տարում կատարել է իր առջև դրված խնդիրները:
Ռեկտոր Արմեն Սարգսյանը շնորհակալություն է հայտնել ֆակուլտետի պրոֆեսորադասախոսական կազմին և ուսանողությանը՝ կատարված աշխատանքի համար և կարևորել միջազգային պարբերականներում գիտական հոդվածներով հանդես գալու անհրաժեշտությունը, ուսանողների շրջանում գիտական ուղղվածությամբ միջոցառումների ակտիվացումը: Հաշվետվությունը գնահատվել է բավարար: