2020թ. 44-օրյա պատերազմից հետո մայիսյան եռատոնի խորհուրդն այլ ընկալում ունի։ Հաղթանակներ խորհրդանշող օրը դիմավորում ենք կորստի ցավը կրծքում սեղմած, մեր հայրենիքում ապրելու և արարելու անկոտրում կամքը՝ բռունցք դարձրած։
Մայիսյան եռատոնի խորհուրդը նաև դաս է ամփոփում իր մեջ՝ ուղղված սերունդներին։ Այդ դասն էր ԱրՊՀ-ում միջոցառմամբ միավորել ուսանողներին, դասախոսներին, հրավիրվածներին՝ նախաձեռնությամբ ԱրՊՀ իրավունքի ամբիոնի դասախոս, ի.գ.թ., դոցենտ Ռիտա Առուստամյանի։ Միջոցառումը մեկնարկեց լռության րոպեով՝ ի հիշատակ արցախյան պատերազմներում անմահացած քաջորդիների։
«Իրավագիտություն» 1-ին կուրսի ուսանողները հանդես եկան ելույթներով, ասմունքով՝ ևս մեկ անգամ կարևորելով մեր հաղթանակները, վերհիշեցին դրանց հասնելու անցած ճանապարհը և հաստատեցին այդ սուրբ գործը շարունակելու իրենց պատրաստակամությունը։
Միջոցառմանը ելույթ ունեցան իրավունքի ամբիոնի վարիչ Տաթև Գևորգյանը, միջոցառման կազմակերպիչ Ռիտա Առուստամյանը՝ ընդգծելով պատմության ընթացքում մեր ունեցած հաղթանակների արժևորումը և որպես լավագույն դաս՝ դրանցով առաջնորդվելու անհրաժեշտությունը։
Միջոցառման վերջում մասնակիցները ծաղիկներ են խոնարհել ԱրՊՀ անմահացած ուսանողների հիշատակը հավերժացնող հուշակոթողին՝ հարգանքի տուրք մատուցելով հանուն հայրենիքի հավերժի ճամփորդ դարձած ուսանողների հիշատակին։
08 Մայիս 2023
