Մայիսի 15-ից Արցախի պետական համալսարանում մեկնարկել են ամփոփիչ ատեստավորման քննությունները, ավարտական աշխատանքների և մագիստրոսական թեզերի պաշտպանությունները։
Ըստ ԱրՊՀ ուսումնական աշխատանքների կազմակերպման բաժնի պետ Իրենա Խաչատրյանի՝ 2022-2023 ուստարում Մայր բուհն ավարտում է շուրջ 450 ուսանող, որից բակալավրիատը՝ 365, իսկ մագիստրատուրան՝ 85 ուսանող:
ԱրՊՀ ռեկտոր Արմեն Սարգսյանի խոսքով՝ սխալ կլինի ասել, որ երկրում ստեղծված իրավիճակը չի ազդել ուսումնական գործընթացի վրա, բայց ջանքեր են գործադրվել՝ գործընթացը հնարավորինս լիարժեք կազմակերպելու համար, և բոլոր անհրաժեշտ նախապատրաստական աշխատանքներն իրականացվել են՝ քննաշրջանը պատշաճ մակարդակով կազմակերպելու համար։
Մայիսի 10-ին կայացած գիտական խորհրդի նիստում օրակարգային հարցերից էր շրջափակման հետևանքով Արցախի Հանրապետության սահմաններից դուրս գտնվող ավարտական խմբերի ուսանողների՝ ամփոփիչ ատեստավորման քննություններին մասնակցելու հարցը:
Գիտխորհուրդը հարցը քննարկել և որոշում էր կայացրել թույլատրել շրջափակման հետևանքով Արցախի Հանրապետության սահմաններից դուրս գտնվող ուսանողների առաջին կիսամյակի քննաշրջանը և ամփոփիչ ատեստավորման քննությունները հեռավար կազմակերպելը։
Շուրջ 35 ուսանողի հնարավորություն է ընձեռվել հեռավար մասնակցելու ամփոփիչ ատեստավորման քննություններին:
Բոլոր նրանց համար, ովքեր ավարտական խմբերում ամփոփիչ որակավորման քննությունների պետք է մասնակցեին, նախապես կազմակերպվել են մեկշաբաթյա խորհրդատվական ժամեր, ևս մեկ անգամ քննարկվել են հարցատոմսերում ընդգրկված անհասկանալի հարցերը:
«Այս տարի նախապես բոլոր ավարտական աշխատանքներն ու մագիստրոսական թեզերն ուղարկել ենք հանձնաժողովի նախագահներին, որպեսզի նախապես ծանոթանան աշխատանքներին, և կարողանան ավելի օբյեկտիվ գնահատել դրանք»,-ասել է Գ. Սահակյանը՝ հավելելով, որ գործընթացն ընթանում է բնականոն հունով, էական խնդիրներ չեն արձանագրվել։
Համաձայն գիտխորհրդի կողմից հաստատված 2022-2023 ուստարվա ուսումնական գործունեության օրացույցի՝ ամփոփիչ ատեստավորման քննությունները, ավարտական աշխատանքների և մագիստրոսական թեզերի պաշտպանությունները կտևեն մինչև մայիսի 19-ը։
15 Մայիս 2023
