«Դեֆորմացվող միջավայրերի փոխազդեցության դինամիկայի պրոբլեմները» VII միջազգային գիտաժողովը Ստեփանակերտում է

24.09

2014

     DSC00297  DSC00312  DSC00317

Հայաստանի գիտությունների ազգային ակադեմիայի մեխանիկայի ինստիտուտը, Գորիսի եւ Արցախի պետական համալսարանները, Մոսկվայի պետական համալսարանի մեխանիկայի ինստիտուտը եւ Ռուսաստանի ազգային ակադեմիայի մեխանիկայի պրոբլեմների ինստիտուտը սեպտեմբերի 22-26-ը կազմակերպել են «Դեֆորմացվող միջավայրերի փոխազդեցության դինամիկայի պրոբլեմները» VII միջազգային գիտաժողովը, որին մասնակցում են շուրջ 100 գիտնականներ Հայաստանից, Արցախից, Ռուսաստանից, Վրաստանից և Ուկրաինայից:

Գիտաժողովը բացվեց Երևանում սեպտեմբերի 22-ին և այսօր, նախատեսվածի համաձայն, այն Ստեփանակերտում է: Գիտաժողովի մասնակիցները, նախքան նիստը, հարգանքի տուրք մատուցեցին ԱրՊՀ զոհված ուսանող-ազատամարտիկների հուշարձանին:
Նիստը բացեց ԱրՊՀ ռեկտոր Մ.Մինասյանը: Ռեկտորն իր և ԱրՊՀ պրոֆեսորադասախոսական կազմի անունից ողջունեց գիտաժողովի մասնակիցներին և շնորհակալություն հայտնեց կազմակերպիչներին այդ շրջանակներում չորրորդ անգամ Արցախում լինելու համար. «Մենք բարձր ենք գնահատում գիտաժողովի կազմակերպիչների պատրաստակամությունը` արդեն չորրորդ անգամ ԱրՊՀ-ում նման ձևաչափով միջազգային գիտաժողով կազմակերպելու համար: Արցախը, արցախցին միշտ էլ բարձր է գնահատել գիտությունը, գիտելիքի արժեքը և, եթե հետադարձ հայացք ձգելու լինենք, ապա կտեսնենք, որ Արցախը միշտ էլ լուսավորյալներ է տվել գիտությանը, և ես համոզված եմ, որ Արցախը` ի դեմս նոր լուսավոր դեմքերի, աշխարհին դեռ շատ է անգամ է հիշեցնելու իր մասին»:
Նիստին ներկա ԼՂՀ ԿԳ նախարար Ս.Ասրյանը ողջունեց նման ձևաչափով գիտաժողովների դերը` ընդգծելով դրանց անհրաժեշտությունն ու կարևորությունը գիտության տարբեր ոլորտներում: «Անհերքելի է, որ գիտական միտքը միշտ էլ եղել է պետությունների ուշադրության կենտրոնում, քանի որ ներկայիս տնտեսությունն առանց գիտության հենքի հնարավոր չէ և այնպիսի կարևոր խնդիրներ, որ գիտաժողովի ընթացքում կշոշոփվեն, անշուշտ, ներդրում կլինեն այս ոլորտում»,- նշեց նախարարը:
Նիստից հետո գիտաժողովի մասնակիցները ԱրՊՀ կազմակերպչական խմբի ուղեկցությամբ շրջայց կկատարեն Ստեփանակաերտ քաղաքի տեսարժան վայրերով: