Ծնվել է 1997թ. օգոստոսի 26-ին Մարտակերտի շրջանի Ճանկաթաղ գյուղում: 2003-2015թթ. սովորել է գյուղի միջնակարգ դպրոցում, որն ավարտելուց հետո ընդունվել է ԱրՊՀ բնագիտական ֆակուլտետի «Աշխարհագրություն» բաժինը:
Մասիսն աշխույժ, բարի, ընկերասեր, կատակասեր, մարդամոտ տղա էր, ամեն մի դժվար իրավիճակից ելք գտնում էր: Զենքի հանդեպ սեր ուներ: Փոքր տարիքից զբաղվում էր որսորդությամբ: Շատ էր սիրում փոքր երեխաներին: Նշանված էր, որոշել էր պատերազմի ավարտից հետո ամուսնանալ և որդի ունենալ՝ անվանակոչելով նրան Մոնթե:
2016թ. հունվարին զորակոչվել է բանակ և ծառայության անցել Մարտունու N զորամասում: Իր ակտիվ մասնակցությունն է ունեցել ապրիլյան քառօրյա պատերազմում:
2018թ. ավարտել է ծառայությունը և շարունակել ուսումը: Սովորելուն զուգահեռ աշխատել է «Բեյզ մեթըլս» ընկերությանը պատկանող Կաշենի լեռնահանքային համալիրում:
Պատերազմի առաջին օրվանից առաջնագծում էր: Զոհվելուց ընդամենը ժամեր առաջ հասցրել էր զինվորների կյանքեր փրկել:
Նոյեմբերի 1-ին՝ հերթափոխի ժամանակ, անօդաչու թռչող սարքը Կարմիր շուկա գյուղի մատույցներում ֆիքսել էր մեքենան և հարվածել: Մասիսի հետ զոհվել են իր երկու ընկերները:
Ծնվել է 2001թ. հունիսի 30-ին Ասկերանի շրջանի Այգեստան գյուղում:
2007-2019թթ. հաճախել է գյուղի Խ. Աբովյանի անվան միջնակարգ դպրոցը: Հմուտ աշակերտ էր, խելացի, բանիմաց, նպատակներով ու երազանքներով լի: Բնավորությամբ շատ համեստ էր, մեծի հետ՝ մեծ, փոքրի հետ՝ փոքր:
Նա շատ ընկերներ ուներ, բոլորը վստահ էին, որ ցանկացած հարցում Հայկը նրանց կհասնի և կաջակցի:
Հայկն առանձնակի սիրով էր ֆիլմեր դիտում: Սպորտային մարզաձևերից սիրում էր խաղալ բասկետբոլ, շատ անգամներ է մասնակցել շրջանային և հանրապետական մրցումների, զբաղեցրել մրցանակային տեղեր:
2019թ. ընդունվել է ԱրՊՀ բանասիրական ֆակուլտետի «Հայոց լեզու և գրականություն» բաժինը: Նույն թվականին էլ անցել է ծառայության Ջրականում:
Ծառայության մեկ տարին և 3 ամիսն արդեն անցել էր, երբ սկսվեց դաժան պատերազմը: Երբևէ չի դժգոհել ծառայությունից:
Հայկը մարտական գործողություններին մասնակցել է հենց առաջնագծում: Զոհվել է հոկտեմբերի 19-ին:
Ծնվել է 2002թ. հունվարի 2-ին Մարտակերտի շրջանի Մաղավուզ գյուղում: 2008-2017թթ. սովորել է Մաղավուզի Մ. Դանիելյանի անվան միջնակարգ դպրոցում: 2017-2018թթ. Իլյան սովորել է Ստեփանակերտի Ք.Իվանյանի անվան ռազմամարզական վարժարանում:
Մեկ ամսվա մեջ ֆիզիկական բարձր պատրաստվածության շնորհիվ ճանաչվել է «Լավագույն զինվոր-մարզիկ»:
2019-2020թթ. տեղափոխվել է գյուղ և ավարտել տեղի դպրոցը: Դպրոցում և վարժարանում մասնակցել է ստեղծագործական, մարզական մրցաշարերին, «Հայ ասպետ» հեռուստանախագծին՝ գրավելով առաջնակարգ տեղեր և արժանանալով խրախուսանքների ու մեդալների: Իլյան շատ էր սիրում սպորտը և առանձնահատուկ սեր ուներ վոլեյբոլի նկատմամբ:
2020թ. ընդունվել է ԱրՊՀ մանկավարժության և սպորտի ֆակուլտետի «Ֆիզիկական դաստիարակություն և սպորտ» բաժինը: Բարի, կամեցող, լավատես, համառ, հաստատակամ, խելացի ու նպատակասլաց` ճանաչողները այսպես են բնութագրում մերօրյա հերոսին: Անշահախնդիր ու բոլորին օգնող տղա էր Իլյան:
2020թ. օգոստոսի 11-ին Իլյան ծառայության է անցնում Հադրութի N զորամասում: Պատերազմի առաջին օրերին վաշտի կեսը զոհվել է, վիրավոր ու զոհված ընկերներին ինքն ու իր ընկերներն են հանել մարտադաշտից: Չնայած Հադրութում էր ծառայում, բայց մասնակցել էր նաև Մարտունու և Շուշիի մարտերին:
Վիրավորվել է նոյեմբերի 7-ին: Անմահացել է նոյեմբերի 9-ին Շուշիում՝ նռնակը գրպանում բացած: Իլյան երազում էր ծառայությունն ավարտելոց հետո վերանորոգել տունը, իսկ համալսարանն ավարտելուց հետո՝ գյուղի դպրոցում վոլեյբոլի խմբակ ունենալ և մարզել երեխաներին:
Ծնվել է 2001թ. հուլիսի 19-ին քաղաք Ստեփանակերտում: 2007-2019թթ. սովորել է Վ. Ջհանգիրյանի անվան N11 դպրոցում: Սովորելու տարիներին աչքի էր ընկնում իր կազմակերպչական ձիրքով, ընկերների և, առհասարակ, շրջապատի նկատմամբ հոգատար վերաբերմունքով: Վեց տարեկանից սկսել էր զբաղվել բասկետբոլ մարզաձևով:
Տասնյակ անգամներ բասկետբոլի թիմային առաջնություններում թիմն իր պրոֆեսիոնալ խաղի շնորհիվ առաջնակարգ տեղ էր գրավել և արժանացել շնորհակալագրերի:
Էրիկին դեռ մանկուց առանձնակի հոգատարությամբ ու յուրահատուկ սիրով էին վերաբերվում հարազատներն ու բարեկամները: Բնավորությամբ անհանգիստ էր, միշտ շարժման մեջ:
2019թ. Էրիկն ընդունվել է ԱրՊՀ մանկավարժության և սպորտի ֆակուլտետի «Ֆիզիկական դաստիարակություն և սպորտ» բաժինը: Ուսումը կիսատ թողնելով՝ 2019թ. հունվարի 8-ին զորակոչվել էր բանակ:
2020թ. հոկտեմբերի 2-ին՝ վաղ առավոտյան, հրամանատարի հետ Մարտակերտի ուղղությամբ մարտական առաջադրանք կատարելիս թշնամին թիրախավորել և հրթիռակոծել էր Մարտակերտի պաշտպանական շրջաններից մեկի հրետանու պետ, Էրիկ Հովսեփյանի հրամանատար Արման Դլեյանի ՈՒԱԶ մակնիշի ծառայողական ավտոմեքենան: Մեքենայի մեջ զոհվել են Էրիկ Հովսեփյանը և հրամանատար Արման Դլեյանը:
Ծնվել է 2000թ. նոյեմբերի 14-ին Մարտունու շրջանի Խնուշինակ գյուղում:
2006-2018թթ. հաճախել է Խնուշինակի միջնակարգ դպրոցը: Էդգարը մանկուց աչքի էր ընկնում իր արտասովոր մտածողությամբ և ընդունակություններով: Փայլուն տիրապետում էր պատմություն առարկային:
Մասնակցել է բազմաթիվ օլիմպիադաների՝ ինչպես շրջանային, այնպես էլ՝ հանրապետական, գրավել պատվավոր տեղեր, արժանացել պատվոգրերի և դիպլոմների:
Դպրոցն ավարտելուց հետո ընդունվել է ԱրՊՀ պատմության և իրավագիտության ֆակուլտետի «Իրավագիտություն» բաժինը, այնուհետև, ուսումը կիսատ թողնելով, 2019թ. մեկնել ծառայության:
Ծառայում էր Հադրութում՝ որպես հակատանկային ստորաբաժանման ավագ օպերատոր: Գերազանց ծառայության համար ավագ սերժանտի կոչում էր ստացել: Սպայական կազմը միշտ առանձնացնում էր նրան՝ հպարտության առիթ տալով ծնողներին: Տան միակ տղա զավակն էր, ուներ երկու քույր:
2020թ. սեպտեմբերի 30-ին խոցել էր թշնամու տանկ: Զինընկերների վկայությամբ՝ մինչև վերջ կռվել է առանց վախի, հաղթողի ժպիտը դեմքին: Վերջին հեռախոսազանգը եղել է հոկտեմբերի 8-ին:
Հոկտեմբերի 9-ին ընդհատվեց Էդգարի կյանքը՝ անկատար թողնելով նրա բազում երազանքներ: Էդգարը զոհվեց Կարախանբեյլիում:
Ծնվել է 1996թ. հունվարի 16-ին Էջմիածնի շրջանի Արշալույս գյուղում:
Ընտանիքը տեղափոխվել է Հադրութի շրջան՝ գյուղ Մարիամաձոր: Երեք տարեկան էր, երբ մահանում է մայրը, մի քանի տարուց էլ՝ հայրը: Նրան մեծացնում են մայրական կողմով տատիկն ու պապիկը:
2002թ. հաճախում է Մարիամաձորի Ն. Սայիյանի անվան միջնակարգ դպրոցը, որտեղ աչքի է ընկնում իր գիտելիքներով և ակտիվությամբ: Մասնակցում է օլիմպիադաների՝ շրջանային և հանրապետական փուլերում գրավելով առաջին տեղ ՆԶՊ առարկայից:
Դեռ դպրոցական տարիներից ուներ իր շրջապատը, որտեղ շատ սիրված ու հարգված էր: Զաքարը ընկերասեր, հոգատար, ճշտապահ ու ճշտախոս, ջանասեր, խելացի ու տաղանդավոր տղա էր:
2013թ. ավարտում է դպրոցը և ընդունվում ԱրՊՀ՝ «Նախազորակոչային և ֆիզիկական պատրաստություն» բաժինը:
2015-2017թթ. ծառայել է զինված ուժերի շարքերում: Ուներ ավագ սերժանտի կոչում:
2018թ. ծառայության է անցել ԱՀ ոստիկանությունում:
2019թ. ավարտում է ուսումը, ստանում բակալավրի աստիճան, ընդունվում մագիստրատուրա, որը սովորում էր գերազանց:
2019թ. աշխատանքի է անցնում Տող գյուղի Վ. Գրիգորյանի անվան միջն. դպրոցում՝ որպես զինղեկ:
Պատերազմի հենց առաջին օրերին ընկերների հետ մեկնել է առաջնագիծ: Մարտական գործողություններին մասնակցել է Վարանդայում, Կարախանբեյլիում: Տեղեկանալով, որ հայրենի գյուղը ևս վտանգված է, վերադառնում է Մարիամաձոր և հոկտեմբերի 20-ին զոհվում այնտեղ:
Ծնվել է 2001թ. օգոստոսի 16-ին Ասկերանի շրջանի Իվանյան գյուղում:
Ընտանիքի կրտսեր զավակն էր, իրենից մեծ քույր ու եղբայր ուներ: 2007թ. հաճախել է տեղի միջնակարգ դպրոցը: Դեռ մանկուց շատ էր սիրում զինվորական համազգեստն ու մանկուց երազում էր զինվոր դառնալ:
Սովորելու տարիներին սիրում էր ռազմագիտություն և ֆիզկուլտուրա առարկաները, ինչն էլ վճռական եղավ մասնագիտության ընտրության հարցում:
2019թ. ընդունվել է ԱրՊՀ մանկավարժության և սպորտի ֆակուլտետի հեռակա ուսուցման համակարգի «Ֆիզիկական դաստիարակություն և սպորտ» բաժինը:
2020թ. հունվարի 8-ին, կիսատ թողնելով ուսումը, զորակոչվեց բանակ: Ծառայում էր Կիչանում (Սերխավանդ): Ի կատար ածվեց Արտակի վաղեմի երազանքը՝ նա դարձավ զինվոր, ով կարճ ժամանակահատվածում հասցրեց գրավել հրամանատարների և ընկերների սերն ու հարգանքը: Նա և իր զինակից ընկերները իրականացնում էին հետախույզի բարդ ու պատասխանատու աշխատանքը:
2020թ. սեպտեմբերի 27-ին նրանց տեղափոխեցին ՊԲ հյուսիսային ուղղությամբ տեղակայված զորամասերից մեկը:
Հոկտեմբերի 10-ին Արտակը հերոսացավ: Հայրենիքի զինվորը հուղարկավորվեց եղբայրական գերեզմանատանը՝ իր հերոս ընկերների կողքին:
Ծնվել է 2001թ. հունվարի 13-ին Մարտունու շրջանի Ճարտար քաղաքում, հետագայում ընտանիքով տեղափոխվել Մարտակերտ:
Մեծացել և դաստիարակվել է զինվորականի ընտանիքում: 2007թ. ընդունվել է Մարտակերտի Վ. Բալայանի անվան N1 դպրոցը:
Նա շատ պարտաճանաչ տղա էր, մասնակցում էր տարբեր մրցումների, զբաղվում էր բռնցքամարտով:
Ծառայության ընթացքում լավ էր պատրաստվում զինվորական քննություններին և միշտ գերազանց արդյունքներ էր ցուցաբերում:
Բնավորությամբ շատ հանգիստ անձնավորություն էր, հայրենասեր, ընկերասեր, սրտաբաց, նպատակասլաց, մարդկային դրական հատկանիշներով օժտված մի տղա, ով երազում էր զինվորական դառնալ և հոր գործը շարունակել:
Դպրոցն ավարտել է 2019թ. և ընդունվել ԱրՊՀ մանկավարժության և սպորտի ֆակուլտետի ՆԶՊ բաժինը: 2019թ. հուլիսի 8-ին ծառայության է անցել զինված ուժերի շարքերում:
Արսենը ծառայում էր Մարտակերտի զորամասերից մեկում: Ծառայության մեկ տարին և երկու ամիսն արդեն անցել էր:
2020թ. սեպտեմբերի 27-ին սանձազերծված պատերազմում Արսենը իրենց դասակի զինակիցների հետ արիաբար կռվում էր առաջնագծում: Հակառակորդի ԱԹՍ-ն հայտնաբերում է նրանց դիրքը և հարվածում հենց այդ դիրքին:
Արսենը անմահացավ պատերազմի առաջին իսկ օրը:
Ծնվել է 2001թ. ապրիլի 12-ին Մարտունու շրջանի Ճարտար քաղաքում:
2007թ. ընդունվել է Ճարտարի Հ. Հարությունյանի անվան N3 հիմնական դպրոցը: 9-րդ դասարանն ավարտելուց հետո ընդունվել է Ճարտարի ազատամարտիկների անվան N1 հոսքային դպրոցը և ավարտել 2019թ.:
Նույն թվականին ընդունվել է ԱրՊՀ բնագիտական ֆակուլտետի «Մաթեմատիկա» բաժինը:
Շատ երազկոտ տղա է: Նա միշտ սիրում էր այնպիսի անակնկալներ անել մայրիկին, որ բոլորը մնում էին զարմացած, ընկերների շրջանակում քեֆ-ուրախություն կազմակերպողն էր: Ծնողներն ամեն հարցում աջակցում էին իրենց միակ զավակին, սակայն այդ հանգամանքը որևէ բացասական ազդեցություն չունեցավ նրա բնավորության վրա, էգոիզմի ոչ մի դրսևորում չէր նկատվում նրա մոտ:
2020թ. հուլիսի 15-ին համալրեց հայոց բանակի շարքերը՝ մեկ տարի ծառայելով Մատաղիսում:
Սեպտեմբերի 27-ից մասնակցել է բոլոր մարտական գործողություններին, վարել «Ուրալ» մակնիշի մեքենա, զինամթերք տեղափոխել մարտական գործողությունների վայր, միաժամանակ, լինելով ԴՀՏ, փրկել է վիրավոր զինվորների կյանքեր:
Արմանը զոհվել է հոկտեմբերի 23-ին՝ հակառակորդի ավիահարվածից:
Ծնվել է 2000 թ. հուլիսի 22-ին քաղաք Ստեփանակերտում:
2006-2014 թթ. սովորել է Ա. Գրիբոեդովի անվան N3 դպրոցում, 2014-2017թթ.՝ Վ. Ջհանգիրյանի անվան N11 ավագ դպրոցում: Դպրոցական տարիներին Արթուրը սովորում էր գերազանց և լավ, մասնակցում էր դպրոցում ու հանրապետությունում անցկացվող տարբեր միջոցառումների` մշտապես գրավելով մրցանակային տեղեր:
Ութ տարեկանից ցանկություն հայտնեց զբաղվել «կարատե» մարզաձևով: 2008-2017թթ. ընթացքում նա կարողացավ իր քաշային կարգում ու տարիքային խմբում բազմաթիվ անգամ դառնալ Արցախի և Հայաստանի Հանրապետությունների չեմպիոն, մասնակցել էր նաև Եվրոպական մրցաշարերի և զբաղեցրել մրցանակային տեղեր: Բազմաթիվ անգամ արժանացել էր «Տարվա լավագույն մարզիկ» պատվավոր կոչմանը:
Ուսումն ավարտելուց հետո ընդունվել էր ԱրՊՀ տնտեսագիտության ֆակուլտետի «Ֆինանսներ» բաժինը: Մեկ ու կես տարի սովորելով համալսարանում՝ 2019 թ. հունվարի 8-ին զորակոչվեց ծառայության: Զորամասի հրետանային դիվիզիոնում հետախույզ հեռաչափորդ էր, այնուհետև, մասնակցելով կրտսեր հրամանատարների պատրաստման դասընթացներին, նշանակվեց հրետանային դիվիզիոնի հրանոթի հրամանատար–դասակի հրամանատարի տեղակալ:
Պատերազմի առաջին օրը, հրամանատարության որոշմամբ, հրետանային դիվիզիոնը, որը Մարտունու ուղղությամբ էր գործում, տեղափոխեցին Հադրութի շրջան:
Հոկտեմբերի 12-ին հակառակորդի հետ փոխհրաձգության ժամանակ վիրավորվում է Արթուրի ընկերներից մեկը: Նա առաջ է շարժվում` ընկերոջն օգնելու և ստանում մահացու վիրավորում: Այդ թեժ մարտից որոշ զինծառայողների հաջողվում է փրկվել, սակայն առնվազն 15 քաջեր նահատակվում են: Տարածքը երկար ժամանակ մնում էր հակառակորդի վերահսկողության տակ և տղաների աճյունները դուրս բերել չէր հաջողվում: Միայն պատերազմից ամիսներ անց է ԴՆԹ-ի միջոցով պարզվում Արթուրի ինքնությունը: