Արցախի պետական համալսարան
Ապրիլի 14-ը հայ մեծանուն բանաստեղծ Համո Սահյանի ծննդյան օրն է։ Այս տարի լրանում է սիրված բանաստեղծի ծննդյան 108-ամյակը։ Օրվա առթիվ «Հայոց լեզու և գրականություն» մագիստրատուրայի 1-ին կուրսի ուսանողները ուսումնական պլանում ընդգրկված «Համո Սահյանը և պանթեիզմը» դասընթացի շրջանակում դասընթացավար, գրականության և ժուռնալիստիկայի ամբիոնի դասախոս, բ․գ․թ․, դոցենտ Զարինե Սառաջյանի նախաձեռնությամբ կազմակերպեցին գիտական ընթերցումներ՝ նվիրված Համո Սահյանի պոեզիային։ Ուսանողները հանդես եկան գիտական զեկուցումներով․ Դիանա Բալասանյանը՝ «Համո Սահյան․ կյանքն ու գրական գործունեությունը», Լիլիանա Հայրիյանը՝ «Հայրենիքի, հայրենի տան պատկերը Հ․ Սահյանի պոեզիայում», Աքսաննա Համբարձումյանը՝ «Համո Սահյանը՝ բնապաշտ գրող», Աննա Ավանեսանը՝ «Համո Սահյան և Ակսել Բակունց․ երկու հանճարեղ սյունեցի», Մանե Գաբրիելյանը՝ «Մայրենի լեզվի թեման Համո Սահյանի պոեզիայում» թեմաներով։
ԱրՊՀ տնտեսագիտության ֆակուլտետը արդիական հնչեղություն ունեցող խնդիրների շուրջ հաճախակի է կազմակերպում կլոր սեղան-քննարկումներ: Հերթական քննարկումը տեղի ունեցավ այսօր՝ ապրիլի 14-ին: «Տարածաշրջանային զարգացումների տնտեսական հետևանքները» թեմայով կլոր սեղան-քննարկմանը հրավիրված էին տնտեսագիտության ֆակուլտետի պրոֆեսորադասախոսական կազմը, պետական հատվածում աշխատող տնտեսագետներ, ՀՀ-ից հրավիրված տ.գ.թ., դոցենտ Սուրեն Պարսյանը, ՀԿ ներկայացուցիչ և ուսանողներ: Քննարկման ընթացքում մասնագետները բարձրաձայնել են աշխարհաքաղաքական զարգացումների համատեքստում առկա և սպասվող մարտահրավերները, նախանշել դրանց դիմագրավելու ուղիները:
Ապրիլի 13-ին ԱրՊՀ բանասիրական ֆակուլտետի Ակադեմիկոս Սերգեյ Աբրահամյանի անվան հայոց լեզվի ամբիոնի դասախոս, բ.գ.թ., դոցենտ Սիլվա Մինասյանի նախաձեռնությամբ կազմակերպվել են գիտաճանաչողական ընթերցումներ` նվիրված Սլավա Սարգսյանի «Արցախի բնակավայրերը» գրքին։ «Հայոց լեզու և գրականություն» մասնագիտությամբ սովորող ուսանողները գրքից ներկայացրել են իրենց բնակավայրերին վերաբերող հատվածներ, ինչպես նաև հավելյալ տեղեկություններ, որոնք դեռ անտիպ են:
Ապրիլի 13-ին ՀՀ-ից ԱրՊՀ են այցելել ազգագրագետներ, պ.գ.թ., դոցենտ Աշխունջ Պողոսյանը, պ.գ.թ., դոցենտ Սվետլանա Պողոսյանը և Սարդարապատի թանգարանի տնօրեն Հակոբ Մելքոնյանը: Հյուրերը ԱրՊՀ են այցելել պատմաբան, ԱրՊՀ դասախոս, պ.գ.թ., դոցենտ Մելանյա Բալայանի ուղեկցությամբ և հանդիպում ունեցել «Պատմություն» մասնագիտությամբ սովորող ուսանողների և դասավանդող դասախոսների հետ:
Արցախի պետական համալսարանի տնտեսագիտության ֆակուլտետում ընթացիկ ուստարվա 2-րդ կիսամյակից «Միկրոէկոնոմիկայի հիմունքներ» դասընթացի շրջանակում դասախոսում է ՀՀ-ից հրավիրված դասախոս, տ.գ.թ., դոցենտ Սուրեն Պարսյանը: Հերթական ընդլայնված դասախոսությունը Սուրեն Պարսյանը ներկայացրել է այսօր՝ ապրիլի 13-ին, որին ներկա էին տնտեսագիտության ֆակուլտետի ուսանողներ: Դասախոսության թեման վերաբերում էր բիզնեսի կազմակերպման, բիզնես մտածելակերպի ձևավորմանն ու զարգացմանը, բիզնեսի խոչընդոտներին: Բանախոսի խոսքով՝ դասախոսության հիմնական նպատակն էր ուսանողների շրջանում խրախուսել բիզնես սկսելու ցանկությունը, ունակությունները, քանի որ, նրա կարծիքով, ուսանողների մեծ մասը մտածում է հետագայում աշխատել պետական կառույցներում, շատ քիչ տոկոս են կազմում հետագայում բիզնեսով զբաղվելու ցանկություն ունեցող ուսանողները:
Ապրիլի 7-ից 8-ը Վանաձորի Հովհաննես Թումանյանի անվան պետական համալսարանում կազմակերպվել է «Նոր հեռանկարներ ուսանողների գիտահետազոտական ներուժի զարգացման համար» խորագրով 11-րդ հանրապետական ուսանողական գիտաժողովը, որին մասնակցել են ՀՀ և ԱՀ բուհերի ուսանողներ: Գիտաժողովին մասնակցել են նաև ԱրՊՀ տարբեր ֆակուլտետներից ուսանողներ:
Ապրիլի 8-ից 9-ը ՀՀ Հայ-ռուսական (Սլավոնական) համալսարանում ՀՌՀ հումանիտար գիտությունների ինստիտուտի հոգեբանության ամբիոնի նախաձեռնությամբ տեղի է ունեցել «Անձի զարգացման արդի հիմնախնդիրները ժամանակակից իրողությունների պայմաններում» խորագրով միջազգային գիտագործնական կոնֆերանս, որին մասնակցություն է ունեցել նաև Արցախի պետական համալսարանը:
  Արցախի պետական համալսարանի ռեկտոր Արմեն Սարգսյանն այս օրերին աշխատանքային այցով ՀՀ-ում էր: Այցի ընթացքում ապրիլի 8-ին Արցախի պետական համալսարանի և ՀՀ ԳԱԱ Հրաչյա Աճառյանի անվան լեզվի ինստիտուտի միջև կնքվել է պայմանագիր, որի առարկան կողմերի միջև կրթական, գիտահետազոտական և ուսումնամեթոդական ոլորտում համակողմանի համագործակցությունն է՝ համատեղ ծրագրերի մշակման և իրականացման, դասախոսների և հետազոտողների ակադեմիական փոխանակման, համատեղ հայտարարությունների և փաստաթղթերի ստորագրման, տեղեկատվական և մշակութային միջոցառումների իրականացման միջոցով։
  ԱրՊՀ ռոմանագերմանական լեզուների ամբիոնի դասախոս Արմինե Ալեքսանյանի և Չիկագոյի հայ համայնքի ներկայացուցիչ Գառնիկ Քերքոնեանի նախաձեռնությամբ ապրիլի 9-ին Zoom հարթակով կազմակերպվել է առցանց հանդիպում ԱրՊՀ ուսանողության և Չիկագոյի հայկական համայնքի ներկայացուցիչների հետ։
Ապրիլի 8-ին Արցախի պետական համալսարանի բանասիրական ֆակուլտետում կայացավ միջոցառում՝ «Օտարագիր հայ գրականություն» խորագրով։ Մագիստրատուրայի «Օտարագիր հայ գրականություն» դասընթացի շրջանակում գրականության և ժուռնալիստիկայի ամբիոնի վարիչ, դասընթացավար, բ.գ.թ. Նոնա Դավթյանի նախաձեռնությամբ մագիստրանտ Սոնա Մուսայելյանը տարբեր մասնագիտությունների ուսանողների հետ կազմակերպել է միջոցառումը։ Ներկա էին ֆակուլտետի տարբեր ամբիոններց դասախոսներ, գիտական գրադարանի վարիչը, ուսանողներ։